Millət vəkili Qənirə Paşayevanın Türkiyədə yenidən çapdan çıxan “Turan yolçusu” və “Eşq yolçusu” kitablarının imza mərasimi keçirilib.

Kult.az xəbər verir ki, Kırşəhər Beynəlxalq Kitab Fuarında baş tutan imza mərasimində ziyalılar, gənclər, jurnalistlər iştirak ediblər. Belə gözəl tədbirin təşkili üçün Kırşəhər bələdiyyəsinə, tədbirdə iştirak edənlərə və media mənsublarına təşəkkür edən millət vəkili Qənirə Paşayeva onlara Azərbaycan, Qarabağ, Kərkük, Axısxa, Krım, Bayırbucaq, Türkməndağı, Təbriz, Dərbənd, Borçalıdan danışıb və bu barədə ətraflı öyrənməyə çağırıb.

Türk millətinin gənc nəsilləri üçün kitabın önəmindən də danışan millət vəkili kitabın ərsəyə gəlməsində böyük əməyi olan insanlara, kitabı Türkiyə türkcəsinə uygunlaşdıran və redaktoru olan İmdat Avşara təşəkkür edib.

“Kitablara ilk gündən böyük diqqət göstərilməsi bizi çox duyğulandırdı”, - deyən millət vəkili Q.Paşayeva Türkiyənin bəzi bölgələrində də bu kitabların təqdimat və imzalanması üçün dəvət aldığını deyib.