Hələ həyatda bişib-bərkiməmiş gənclərin bir çoxu cinayət aləminin “qəhrəmanlarını” özlərinə ideal, kumir seçir, onların fanatına çevrilirlər. Söhbət qanuni oğrulardan gedir.

Kult.az xəbər verir ki, bu sözləri yazıçı Firuz Mustafa qeyd edib. O bildirib ki, son illərdə çox qorxulu bir mövzuya çox idillik, romantik, sürreal, modern, al-əlvan rənglər qataraq geniş kütləyə təqdim edirlər:

“İndi insan talelərinə “uf” demədən zərbə endirən canilər haqda filmlər çəkilir, kitablar çıxır, nəğmələr qoşulur. Təəssüf ki, öz milləti uğrunda canından keçən əsl qəhrəmanlar arxa planda qalır və cinayət aləminin “qəhrəmanları” ön plana keçir.

Artıq elə mənzərə yaranıb ki, pul və sərvət uğrunda gedən qanlı döyüşlər torpaq və namus uğrunda gedən savaşı üstələyib. Fiziki güc idrakın gücünə qalib gəlməkdədir, incə mənəviyyatı kobud çəkmələr tapdamaqdadır.

Təəssüf ki, cılız insanlar böyük insanlığa arxa çevirirlər, amma müqəddəs kitablarda deyildiyi kimi, “ümidsiz - şeytanlardır”. Və bu mənada ümid edirəm ki, elə bir zaman gələcək ki, bu dünyada bütün dəyərlər öz layiqli yerini alacaq".