Malayziya Milli Kitabxanasında Azərbaycanın bu ölkədəki səfirliyinin təşkilatçılığı ilə Milli Məclisin deputatı, yazıçı-dramaturq Hüseynbala Mirələmovun və Viktor Andriyanovun həmmüəllifləri olduqları “Görkəmli adamların həyatı. Bioqrafiya davam edir” silsiləsindən “İlham Əliyev” kitabının malay dilində nəşrinin təqdimat mərasimi keçirilib.

Kult.az xəbər verir ki, millət vəkili Qənirə Paşayeva tədbirdə Azərbaycanla bağlı geniş məruzə ilə çıxış edib. O, kitabın Azərbaycanın uğurları və nailiyyətləri ilə tanış olmaq üçün mühüm vasitə olduğunu diqqətə çatdırıb.

Deputat Milli Məclisin Malayziya parlamenti ilə əməkdaşlığı genişləndirmək istədiyini xüsusilə qeyd edib.

İki ölkə arasında əməkdaşlığın inkişaf etdirilməsi üçün böyük potensialın olduğu bildirən millət vəkili, ölkə başçısının rəhbərliyi altında bu istiqamətdə işlərin davam etdiriləcəyini bildirib:

“Azərbaycan prezidenti və xalqı Dağlıq Qarabağ problemi, Azərbaycanın ərazi bütövlüyü, işğal edilmiş torpaqlarımızın azad edilməsi istiqamətində Malayziyanın Azərbaycana dəstəyini hər zaman yüksək qiymətləndirir. İnanırıq ki, bu dəstək daha da artacaq. Malayziya ilə ölkəmiz arasında əməkdaşlığın genişlənməsi istiqamətində bir çox işlər görülsə də, hələ də bunun üçün böyük potensial var və biz inanırıq ki, prezident İlham Əliyevin rəhbərliyi altında qarşıdakı 7 il ərzində də bu istiqamətdə işlər daha da genişlənəcək. Azərbaycan bu gün Cənubi Qafqaz regionunun ən inkişaf etmiş ölkəsi olmaqla yanaşı, Qərblə Şərq arasında önəmli bir körpü rolunu oynayaraq, dünya səviyyəsində mədəniyyətlərarası dialoqa böyük töhfələr verir”.