“3 alma” uşaq ədəbiyyatı gənc yazar Orxan Adıgözəlin “Əngəlsiz arzular” əsərini nəşr edəcək.

Kult.az xəbər verir ki, uşaqlar üçün qələmə alınmış kitabda fiziki imkanları məhdud şəxslərin cəmiyyətə adaptasiyası problemindən bəhs olunur. Əsərdə bu problemin azyaşlı uşaqların həyatına təsiri ayrı-ayrı lövhələrlə göstərilir.

Əsərin qəhrəmanı ayağını itirmiş Nihad adlı oğlandır. Kitabda onun həyat hekayəsi, ətrafdakıların ona fərqli münasibəti və onun bu münasibəti dəyişmək üçün apardığı mübarizə, tək ayaq üstə durmaq üçün göstərdiyi əzm, bütün əngəllərə qalib gələn arzuları, çəkdiyi zəhmət və eyni zamanda dostlarının, ailəsinin ona mənəvi yardımı təsvir olunur.

Mövzu baxımından uşaq ədəbiyyatında yeni olan “Əngəlsiz arzular” kitabı yaxın vaxtlarda oxuculara təqdim ediləcək.