AMEA-nın Məhəmməd Füzuli adına Əlyazmalar İnstitutunun elmi şurasının qərarı ilə XIX əsrin sonu, XX əsrin birinci yarısında Azərbaycanda xalq maarifi və pedoqoji fikrin inkişafı, məktəb və elmin tərəqqisi sahəsində mühüm xidmətləri olmuş Rəşid bəy Əfəndiyevin “Bəsirətül-ətfal” ( Uşaqların idrakı) əsərinin “Elm” nəşriyyatı tərəfindən transfonoliterasiya olunmuş variantı çap edilib.

Kult.az xəbər verir ki, kitabın elmi redaktoru akademik Möhsün Nağısoylu, tərtib edib nəşrə hazırlayan və “Ön söz”ün müəllifi isə Aynurə Məmmədovadır.

21 Fevral Beynəlxalq Ana dili günü ərəfəsində ərsəyə gələn bu kitab araşdırmaçılara həmin dövrün ana dili dərsliklərini tədqiq etməkdə yardımçı olacaq.

Qeyd edək ki, dərslik ilk dəfə 1901-cı ildə Qafqaz Senzura Komitəsinin qərarı ilə çap edilib. “Bəsirətül-ətfal” XX əsrin ilk ana dili dərsliyi hesab edilir.