Avrasiya Beynəlxalq Araşdırmalar İnstitutu İctimai Birliyi, Regional Hüquqi və İqtisadi Maarifləndirmə İctimai Birliyi və “Azərkitabın” təşkilatçılığı ilə “Azərkitab” kitab evində Bakı Dövlət Universitetinin “Qafqaz xalqları tarixi” kafedrasının müdiri, tarix elmləri doktoru, professor, Azərbaycan Respublikasının əməkdar müəllimi, YAP Siyasi Şurasının üzvü, Elm, təhsil və innovasiyaların inkişafında xidmətlərinə görə Beynəlxalq “Sokrat” mükafat laureatı, Türk Dünyası Araşdırmaları Beynəlxalq Elmlər Akademiyasının üzvü və həmin akademiyanın “Qızıl ulduz” mükafatı laureatı, Birləşmiş Millətlər Təşkilatının Təltiflər Şurasının (İsveçrə, Cenevrə) “Elm və sülh səfiri” laureatı və dünya elminə göstərdiyi xidmətlərinə görə “Avropa Xidmət Ordeni” ilə təltif edilən İradə Mehtiqulu qızı Hüseynovanın kitablarının təqdimat mərasimi keçirilib.

Kult.az xəbər verir ki, tədbiri giriş sözü ilə Regional Hüquqi və İqtisadi Maarifləndirmə İB-nin sədri Arzu Bağırova açıb, İradə Hüseynovanın yaradıcılığından və əsərlərindən danışıb.

AMEA-nın həqiqi üzvü, AMEA-nın ictimai elmlər bölməsinin akademik-katibi professor Nərgiz Axundova cıxışında tarix elmləri doktoru, professor İradə Hüseynovanın əliyevşünaslığın, qafqazşünaslığın inkişafında xüsusi xidmətləri olan görkəmli alim kimi xarakterizə edib.

Xalq yazıçısı Anar deyib ki, Yazıçılar Birliyinin üzvü olan İradə Hüseynovanın əsərləri haqda danışıb, ona uğurlar arzu edib.

Millət vəkili, siyasi elmlər doktoru Qənirə Paşayeva çıxış edərək bildirib ki, İradə xanım Hüseynova kimi tanınmış alimlərin, ziyalıların yaradıcılığına müraciət etmək, onlarla görüş keçirmək böyük əhəmiyyət kəsb edir.

Tədbirdə millət vəkilləri Elman Nəsirov və Aydın Hüseynov, tarixçi alimlər Qasım Hacıyev, Nurulla Əliyev, Şikar Qasımov, ‎İlqar Niftəliyev çıxışlarında professor İradə Hüseynovanın elmi xidmətlərini vurğulayıblar.

Təqdimat mərasimində iştirak edən qonaqlara İradə Hüseynova müəllifi olduğu kitablarını öz imzası ilə hədiyyə edib.