Axar.az
Yuxarı

Axar.Az Logo

Leyla Əliyevadan əsgərimiz haqqında - Şeir

Ana səhifə Kult Ədəbiyyat
12 Punto 14 Punto 16 Punto 18 Punto

Kult.az “Aydın yol”a istinadən Leyla Əliyevanın Azərbaycan əsgərinin ölümsüzlüyü haqqında qələmə aldığı şeirlərini təqdim edir.

Əsgər

Əsgər... Ədalətə tapınan insan.

Qəlbi Qələbənin eşqiylə yanar.

Əsgər... Ürəyində vətən vəfası,

Köksündə bir sükut çığırtısı var.

Güllə qabağında qırpılmaz gözü,

Günəşin önünü dağ kəsə bilməz!

Əsgər gözəl bilir: sevginin üzü

Həqiqət nurundan heç vədə dönməz.

Qorxusuz gözləri yırtar gecəni,

Alnına qırmızı kölgə salar dan...

Zülmətdən qorxmağı anlamaq olar,

Dərd odur, dərd odur Gündən qorxasan.

Eşidər Allahın pıçıltısını,

İlahi nəfəsdən gərilər sinə.

O, yalan içində batan dünyanın

Yükünü qaldırar çiyinlərinə.

Əsgər... Öz yurduna ilahi bir pay:

Doğulub müqəddəs gündə, saatda.

Zalımın bu nankor, bu kor kölgəsi

Əriyər qəlbinin işığı altda.

Gərər sinəsini şərə, şeytana,

Elin hər daşının həyanı olar.

Taleyi yazılmış açıq alnını

Söykər sərhəd boyu uzanan yola.

Sancılar bayraqtək yüksəkliklərə,

Günəşə qoşulub yanan çıraqdı.

Yeriyər, yer titrər ayağı altda,

And yeri vicdandı, and yeri haqdı.

Onun vətənindən müqəddəsi yox,

Onun dağlarından yoxdu ucası.

Düşür sümüyünə torpağın indi

Mətin addımların melodiyası.

Hər insan Allahın səsidir axı:

Nə qorxar qanından, nə can əsirgər.

Gözünün rəngində torpaq qarası,

Kürəyi vətənin hasarı əsgər.

***

Bombalar səs-səsə veriblər yenə,

Vətənin bağrından qan axır indi.

Düşmən gülləsinə tuş olan əsgər,

Yaran qəlbin qədər dərin, dərindi.

Ağlayır bir ata itirmiş uşaq,

Ağlayır göylərdə Günəş də bu gün.

Ellikcə savaşa hazırıq, Vətən,

O dərdli uşağın göz yaşı üçün.

Bir gün qayıdacaq yerinə hər şey,

Bir gün sevinəcək bu yurd, bu ocaq...

Ancaq o atanın isti qucağı

Bir də o uşağa açılmayacaq.

Elimiz qələbə sorağı gözlər:

Gözləri yoldadı, qulağı səsdə.

Analar əlini qoyub and içir

Oğul itkisinin ağrısı üstə.

Gün gələr, o zəfər xəbəri gələr,

Öpər igidlərin başdaşlarını.

Ata nisgiliylə qovrulan uşaq

Dəfn elər gözündə göz yaşlarını.

Tarix
2021.02.04 / 10:05
Müəllif
Kult.az
Şərhlər
Digər xəbərlər

Aida Eyvazlı Göytürkün bu kitabı yenidən işıq üzü gördü

Alimimiz Nizami Gəncəvi barədə mühazirə oxuyacaq

"Dədə Qorqud” jurnalı “Index Copernicus”a daxil oldu

“Azərbaycan Cəngi rəqsləri” nəşr olundu

İstanbulda naşirlər görüşü - Foto

Satanistlə Sabunçuda baronun evində: süfrədə uşaq əti...

Daha bir ilk yaşandı: Süni intellekt pyes yazdı

Rəsulzadənin xilas etdiyi Rzayevin gündəliyi...

Nəriman Həsənzadəyə həsr olunan poeziya axşamı... - Foto

İlham Rəhimov Həsənzadəni təbrik etdi

KULT
<>
Xəbər xətti
  
  
  
yatsan
Axar.az'da reklam Bağla
Reklam
Bize yazin Bağla