Azərbaycan poeziyasında böyük iz qoymuş iki şairin – Vaqif Səmədoğlu və Ramiz Rövşənin uzun illərə dayanan dostluğu olub.

Axar.az xəbər verir ki, ölümündən bir müddət əvvəl əməkdaşımıza verdiyi müsahibədə dostlarının ona qayğısından danışan Vaqif Səmədoğlu şair Ramiz Rövşənlə bağlı xatirələrindən də söz açır:

"Ramizin atası Məmmədəli kişi sağ olanda Əmircanda bir evləri varıydı, ayda iki-üç dəfə gedirdim, gecə də qalırdım. Allah rəhmət eləsin, Məmmədəli kişi məni yaman çox istəyirdi. Məmmədəli kişi o saat süfrə açırdı, içki-zad gətirirdi. Axşamdan səhərə qədər Ramiz özünü saxlaya bilmirdi. Ramiz bir az içən kimi elə bil, zənciri qırmış köpək itidir. Yox, dava salmır, ancaq şeir deyir. Mənim şeirlərimi Ramiz Rövşən mənim yadıma salırdı. Çox qəribə günlər idi".

Mərhum xalq şairi dostu Ramiz Rövşəndən son dəfə nə istədiyini də dilə gətirir:

"Ramiz Rövşən mənə deyir ki, sənin üçün nə eləyə bilərəm? Dedim, ancaq bir şey eləyə bilərsən, öləndən sonra yaxşı şeir yaz. Bundan artıq neyləyə bilərsən?"

Xatırladaq ki, xalq şairi Vaqif Səmədoğlu uzun sürən xəstəlikdən sonra bu il yanvarın 28-də 76 yaşında dünyasını dəyişib.