Bu gün Azərbaycan Yazıçılar Birliyində Xalq şairi Sabir Rüstəmxanlının "Şair və şər" romanının təqdimatı keçirilib.

Axar.az xəbər verir ki, "Natəvan" klubunda baş tutan təqdimatda AYB sədri Anar, Xalq yazıçısı Çingiz Abdullayev, "Azərbaycan" jurnalının baş redaktoru İntiqam Qasımzadə və şairin qələm dostları, oxucular iştirak ediblər.

Tədbiri giriş sözü ilə açan Çingiz Abdullayev Sabir Rüstəmxanlının həm ictimai xadim, həm də yazıçı kimi Azərbaycan tarixində mühüm rol oynadığını qeyd edib. Onun digər kitablarının da böyük mənəvi çəkisi olmasından söz açıb.

AYB sədri Anar yeni romanı münasibətilə Sabir Rüstəmxanlını təbrik edib, kitabı böyük həvəslə oxuyacağını bildirib.

"Azərbaycan" jurnalının baş redaktoru İntiqam Qasımzadə S.Rüstəmxanlının şeirlərinin, nəsr əsərlərinin "Azərbaycan" jurnalında çap olunmasından daim məmnunluq hissi keçirdiyini deyib.

Qeyd edək ki, Sabir Rüstəmxanlının "Şair və şər" kitabı Azərbaycanın böyük şairi Məhəmməd Hadinin faciəli həyatından bəhs edir.