Bir müddət əvvəl tənqidçi Əsəd Cahangirin "Azərbaycan" jurnalının baş redaktor müavini vəzifəsindən uzaqlaşdırılması ilə bağlı məlumat vermişdik.

Boş qalan vəzifəyə hər hansı bir təyinat olub-olmamasını öyrənmək üçün "Azərbaycan" jurnalının baş redaktoru İntiqam Qasımzadə ilə əlaqə saxladıq. Jurnalistin vəzifə borcunu bilməyən və keçmiş əməkdaşını, tanınmış tənqidçini "adi bir redaksiya işçisi" adlandıran İntiqam Qasımzadə Axar.az-ın sualını kobud şəkildə cavablandırıb:

"Siz Əsəd Cahangirin yerinə kimin təyin olunmağı ilə niyə maraqlanırsınız? Gedin öz işlərinizlə maraqlanın! Əsəd baş nazirin, ya milli təhlükəsizlik nazirinin müavinidir, maraqlanırsınız? Adi bir redaksiyanın işçisinin taleyi niyə sizi bu qədər narahat edir? Tənqidçidir, tənqidçiliyini eləsin!"

Qeyd edək ki, bir müddət əvvəl İntiqam Qasımzadə mətbuata verdiyi açıqlamada AYB rəhbərliyinə tənqidçi Əsəd Cahangirdən şikayət etdiyini bildirmişdi. Daha sonra Əsəd Cahangir "Azərbaycan" jurnalının baş redaktor müavini vəzifəsindən azad olunmuşdu.