Moskvada Azərbaycan Yazıçılar Birliyi Bədii Tərcümə və Ədəbi Əlaqələr Mərkəzinin nəşri olan "Dünya ədəbiyyatı" jurnalının Rusiya xüsusi sayının təqdimatı keçirilib.

Axar.az xəbər verir ki, təqdimat mərasimində çıxış edən Azərbaycan Yazıçılar Birliyinin sədri, xalq yazıçısı Anar xalqları bir-birinə tanıtdıran və yaxınlaşdıran ən yaxşı vasitənin bədii söz olduğunu vurğulayıb. Xalq yazıçısı jurnalın Azərbaycan-Rusiya mədəni əlaqələrinin inkişafına töhfə verdiyini bildirib.

Jurnalın nəşrini bilavasitə həyata keçirən Mərkəzin rəhbəri şair Səlim Babullaoğlu qurumun fəaliyyəti, sözügedən dərginin məzmunu barədə məlumat verib.

Xalq şairi Fikrət Qoca, şairə Afaq Şıxlı və başqaları Azərbaycan-Rusiya ədəbi əlaqələrindən danışıb. Qeyd olunub ki, "Dünya ədəbiyyatı" jurnalının bu sayı rus ədəbiyyatının 1950-ci illərdən bu günədək olan mühüm bir dövrünü əhatə edir.

Jurnalda yaradıcılığı ya qismən, ya da tamamilə bu dövrə düşən rus ədiblərinin, o cümlədən, Aleksandr Soljenitsın, Vasili Belov, Yuri Trifonov, Vasili Aksyonov, Aleksandr Yaşin, Vasili Şukşin və digərlərinin seçmə əsərləri toplanıb.