Hazırda Azərbaycan məktəblərində bir həftəlik payız tətili elan olunub. Dərslərdən yorulan, məktəb dərsliklərindən sıxılan şagirdlərə bədii kitablar oxumağı təklif edirik.

Axar.az xəbər verir ki, "Qanun" Nəşrlər Evinin direktoru Şahbaz Xuduoğlu 7-11 yaş arası məktəblilər üçün daha çox bədii və tapmaca janrında yazılan kitabları tövsiyə edir:

"7 yaşlı uşaqlar nağılları çox sevirlər, bir neçə sehrli nağıl kitabı nəşr etmişik. Düşüncəni, məntiqi gücləndirən kitablar da var. Onların arasından seçim etmək olar. Qrim qardaşları, Şarl Pero, Hans Andersonun nağıllarından ibarət "Sehrli nağıllar" kitabı var, "555 tapmaca", "Gündəlik sözlər", "Sehrli rus nağılları", "Azərbaycan xalq nağılları", "Qızıl nağıllar" kitablarını məsləhət görərdim. 11 yaşlı uşaqlara isə Səməd Behrənginin "Balaca qara balıq" əsərindən başlayaraq Roald Dahlın, Mark Tvenin əsərlərini tövsiyə edirəm. Əgər sadaladıqlarımı oxuyublarsa, o zaman Jül Vern, Daniel Defo, Astrid Lindqern, Conatan Sviftin əsərlərini və əlbəttə, "Harri Potter"i oxusunlar".