Bu gün tanınmış Azərbaycan şairi Ramiz Rövşənin doğum günüdür.

Axar.az xatırladır ki, Ramiz Rövşən 1946-cı il dekabrın 15-də Bakıda anadan olub. Bakı Dövlət Universitetinin Filologiya fakültəsində təhsil alıb. O, təkcə şair kimi yox, həm də ssenarist, tərcüməçi kimi də fəaliyyət göstərib. Onun ssenariləri əsasında "Babamızın babasının babası", "Almas İldırım", "Haram tikə" kimi bədii və sənədli filmlər çəkilib.

Şeir və hekayələri tərcümə edilərək keçmiş SSRİ respublikalarında, eləcə də, ABŞ-da, Almaniyada, Böyük Britaniyada, Fransada, Polşada, Bolqarıstanda, Türkiyədə və İranda çap olunub.

Ramiz Rövşən "Bir yağışlı nəğmə", "Göy üzü daş saxlamaz", "Kəpənək qanadları", "Gedək biz olmayan yerə", "Sevgi məktubu kimi", "Yağış yuyur, gün qurudur" və başqa kitabların müəllifidir. Görkəmli şair "Şair ruhu", "Şeir ruhu" deyərkən şeiriyyətin yalnız dil hadisəsi, sözlərin müxtəlif kombinasıyası olmadığını düşünür:

"Şeiriyyətdə, musiqidə, ümumən, mədəniyyətdə ilahi ibtidanın mövcudluğu şübhəsizdir. Qədim latın mədəniyyətində söz iki mənanı bildirib: "kultura aqri" - torpaqdan yaranmaq və "kultura Dei" - Allaha çatmaq. İstedad Allahın ənamıdır. Onu hansısa yolla ələ keçirmək, ona yiyələnmək mümkün deyil".

Ramiz Rövşəni 69 yaşının tamam olması münasibətilə təbrik edir və şeirlərindən bir neçəsini təqdim edirik:

Darıxır

Bu nə təhər darıxmaqdı,
Axı belə kim darıxır?!
Cibimdə əlim darıxır,
Ağzımda dilim darıxır.

Darıxır qabım-qaşığım,
Darıxır yorğan-döşəyim.
Evdə qalsam, evim-eşiyim.
Yol getsəm, yolum darıxır.

Yoluma qızlar çıxsalar,
Gülüb üzümə baxsalar,
Yaxama bir gül taxsalar,
Yaxamda gülüm darıxır.

Hara atım bu kədəri?
Yox hesabı, yox qədəri,
Görünür məndən ötəri
Hardasa ölüm darıxır.

Gedək biz olmayan yerə

Gəl, əl-ələ tutub gedək,
Gedək biz olmayan yerə
Hər dərdi unudub gedək,
Dərdimiz olmayan yerə.

Burda qoyaq özümüzü,
Bu qırışan üzümüzü,
Bu köhnələn sözümüzü,
Gedək biz olmayan yerə.

Bir kimsə tutmasın xəbər
Gəl çıxıb gedək birtəhər.
Bu ev, bu küçə, bu şəhər,
Bu dəniz olmayan yerə.

Atam oğlu az çapala,
Sən deyən çətin tapılar,
Bu Ramizi kim aparar,
Bu Ramiz olmayan yerə?!

Nə var Allahdan yuxarı?!

Nə var Allahdan yuxarı?
Nə var qəbirdən aşağı?
Çəkdiyim ahdan yuxarı?
Bildiyim sirdən aşağı?

Niyə günün gündüzündə
Quşlar azır göy üzündə?
Göz yaşları quş gözündən
Tökülür dən-dən aşağı.

Demə, biz ki quş deyilik,
Allaha tanış deyilik...
Ruhum, dur, yığış, gedirik,
Sən yuxarı, mən aşağı...