Dünya şöhrətli italyan yazıçı Umberto Eko dünən axşam saatlarında vəfat edib.

"Umberto Eko kim idi?"

Axar.az ədəbiyyat adamlarının bu suala cavablarını təqdim edir:

Cavanşir Yusifli: "Qızılgülün adı".

Həmid Herisçi: "Mən Ekoya "Allah rəhmət eləsin" deyirəm, amma bilirəm ki, o vəfat etməyib. Onun ruhu sağdır. Eko ilə Azərbaycanı bağlayan çox şey var idi. Onun məşhur "Qızılgülün adı" romanında hadisələr İtaliyanın Apulya şəhərindəki Kastel Del Montda cərəyan edir və o Kastel Del Mont səkkizbucaq adlanır. Bildiyiniz kimi, Azərbaycanın da rəqəmi səkkizdir".

Aqşin Yenisey: "Kamü hesab edirdi ki, hər bir filosof roman yazmalıdır. Daha sonra bu fikir filosoflardan alimlərə keçdi. Eko bizə tarixi biliklərin bədiiləşdirilmiş formasını miras qoyub getdi. Onun ölümü ədəbiyyatçılardan daha çox, tədqiqatçıların itkisidir. O özündən heç nə kəşf etmədi ədəbiyyatda, amma özünə qədərki bütün kəşflərə çox gözəl sahib çıxa bildi".

Qan Turalı: "Ekonun ölümünə çox üzüldüm. XXI əsrə hələ təzə başlasa da, o, bu əsrin yazıçısı idi. Eko Nobel mükafatını almasa da, bir alim, bir yazıçı kimi çoxdan Nobelə layiq idi".