Axar.az-ın "Bir abzas" layihəsində hər hansı ədəbiyyat adamı haqda həmkarlarının fikirlərini təqdim edəcəyik. Layihənin növbəti qonağı azərbaycanlı yazıçı, kinodramaturq Maqsud İbrahimbəyovdur.

Yazıçı Rasim Qaraca Maqsud İbrahimbəyovun yaradıcılığı haqda bir abzaslıq fikrini bölüşür:

"Maqsud İbrahimbəyovun Azərbaycan dilində nəşr olunmuş 4 hekayədən ibarət kitabını oxumuşam – "Ondan yaxşı qardaş yox idi", "Kərgədan buynuzu" və s. Bir də ssenarisi əsasında çəkilmiş filmləri seyr etmişəm. Fikrimcə, yazıçı ustalığı baxımından bu yazarımız şəhər nəsri yazan bütün yazarlarımızdan, Anar və Elçin də daxil olmaqla, daha üstün bir yazardır. Nəyə görəsə yazıçı kimi çox da təbliğ olunmayıb, mediadan da kənarda olub demək olar. Siyasətə qoşulmasını, deputat missiyasını bəyənmirəm, amma ədəbiyyat tarixi baxımından qiymətli insandır. Arzu edərdim, Maqsud İbrahimbəyov yaradıcılığı Azərbaycanda ədəbi məktəbə çevrilsin, gənc yazarlar onun yolunu davam etdirsinlər, qrafomanların yolunu deyil".