Görkəmli ədəbiyyatşünas alim Salman Mümtazın naməlum əlyazması aşkar edilib.

Axar.az xəbər verir ki, AMEA Məhəmməd Füzuli adına Əlyazmalar İnstitutunun böyük elmi işçisi, filologiya üzrə fəlsəfə doktoru Şəlalə Ana Hümmətli Salman Mümtaz adına Ədəbiyyat və İncəsənət Arxivində mühafizə edilən "Azərnəşr"in arxivindəki materialları araşdırarkən alimin naməlum əlyazmalarını tapıb.

Həmin əlyazma sənədlərinin uzun illərdir itmiş "100 şair" kitabının parçalanmış hissələri olduğu aydınlaşdırılıb.

Müxtəlif qovluqlarda saxlanılan bu qiymətli əlyazmalardan hələlik 50-yə yaxın şairin tərcümeyi-halı və şeirlərindən nümunələri toplayan tədqiqatçı hazırda onların ərəb qrafikalı əski əlifbadan müasir əlifbaya transfoneliterasiyası ilə məşğuldur.