Əgər bir şəxs dövlət şirkətinə aid olan obyektlərdə belə bir addım ata bilirsə, bu zaman kifayət qədər ciddi suallar meydana çıxır ki, laboratoriyalar niyə nizamlı işləməyib və analizlər apararaq, problemi vaxtında aşkarlamayıb?

Bu sözləri Axar.az-a açıqlamasında iqtisadçı ekspert Natiq Cəfərli iş adamı Adnan Əhmədzadənin həbsi ilə bağlı qeyd edib.

Ekspert bildirib ki, bu hal SOCAR-a həm iqtisadi, həm də imic baxımından ciddi zərər vurub:

“Azərbaycan dünyada sabit – verdiyi sözü yerinə yetirən enerji tərəfdaşı kimi tanınır və onillərdir ki, bu cür müsbət imicə sahibdir. Təəssüf ki, indi SOCAR-ın bu cür təmiz imici zədələndi.

Ona görə də bu araşdırmanın dərindən aparılacağı və məsuliyyət daşıyan şəxslərin çevrəsinin müəyyənləşəcəyi gözlənilir. Bu məsələdə hər hansı səhlənkarlıq və ya vəzifədən sui-istifadə halları olubmu? Bu suala cavabı istintaq verəcək”.

O ki qaldı ziyana, ekspertin sözlərinə görə, Rumıniyanın və İtaliyanın bir neçə neftayırma zavodu müəyyən müddətə Azərbaycan neftindən imtina etdi, həmçinin Qazaxıstan Azərbaycandan tranzit yolu kimi istifadəni iki aya yaxın dondurdu:

“Bundan sonra “Azəri Layt”ın daha ciddi şəkildə sertifikatlaşdırılması tələb olunacaq ki, bu da əlavə xərclər tələb edir.

Qeyd edim ki, belə hadisələr biznes dünyasında uzun müddət yaddan çıxmır və illərlə xatırladılır.

Konkret maddi ziyana gəldikdə isə, bu barədə də dəqiq məlumat istintaq zamanı üzə çıxacaq. Ancaq xarici medianın verdiyi məlumata görə, SOCAR təxminən 450-500 milyon dollar ziyana düşüb”.