Keçmiş ABŞ Poçt İdarəsi binasının qarşısında qışqıran üç təxribatçı, açıq-aydın ABŞ hökumətini utandırmaq istəyən xarici kəşfiyyat orqanları tərəfindən cəlb edilən pulla ələ alınmış agentlərdir.

Axar.az xəbər verir ki, bunu Globalinfo.az-a amerikalı politoloq Piter M. Teys deyib.

Onun sözlərinə görə, bu üç aqressiv şəxs həbsxanaya salınmalıdır:

“Vaşinqtonda yerləşən dəbdəbəli "Waldorf Astoria" otelinin qarşısında qeydə alınan insidentdə yerli polis məmurunun ehtiyatlı hərəkətlərini və Azərbaycan prezidentinin təhlükəsizlik xidmətinin yüksək peşəkarlıqla hərəkət etdiyini görə bilərik.

Hadisəyə hərtərəfli nəzər saldıqda demək olar ki, Prezidentin təhlükəsizlik xidmətinin əməkdaşları ehtiyatlı davranmış, qabaqlayıcı tədbirlər görmüş və ən yüksək beynəlxalq standartlara uyğun hərəkət ediblər. Pensilvaniya prospektində qışqıran bu təxribatçılar ABŞ ərazisindən deportasiya edilməlidir”.

Qeyd edək ki, fevralın 19-da bir qrup şəxs Vaşinqtondakı "Waldorf Astoria" otelinin qarşısında təxribat xarakterli hərəkətlər edib. Hadisə Azərbaycan Prezidenti İlham Əliyevin ABŞ-a səfəri və Sülh Şurasının ilk iclasında iştirakı zamanı baş verib.

Prezidentin korteji otelə yaxınlaşarkən bir qrup şəxs mühafizə olunan əraziyə zorla daxil olmağa cəhd göstərib və Prezidentin kortejinə hücum etməyə çalışıblar.

Prezidentin Mühafizə Xidməti təxribatın qarşısını alıb.