Yaxın Şərqdə artan gərginlik və xüsusilə Hörmüz boğazı ətrafında yaranan risklər Yaponiya kimi böyük enerji idxalçısı olan ölkələri alternativ mənbələr axtarmağa məcbur edir. Tokio uzun illər neft tədarükündə əsasən Yaxın Şərq ölkələrindən asılı olub. Regionda mümkün hərbi və siyasi risklərin artması isə enerji təhlükəsizliyi məsələsini ön plana çıxarıb.

Bu sözləri Axar.az-a açıqlamasında Liberal İqtisadçılar Mərkəzinin sədri Akif Nəsirli Yaponiyanın ilk dəfə Azərbaycan neftini idxal etməsindən danışarkən deyib.

O bildirib ki, Azərbaycanın etibarlı və sabit enerji tərəfdaşı kimi diqqət çəkməsi təbii hesab olunur:

“Azərbaycan neftinin ilk dəfə Yaponiyaya göndərilməsi göstərir ki, dünya enerji bazarında marşrut və tərəfdaş müxtəlifliyi daha vacib amilə çevrilir. Yaxın Şərqdəki böhran qlobal neft xəritəsinə təsirsiz ötüşmür. Böyük istehlakçı ölkələr artıq tədarük risklərini azaltmaq üçün daha geniş coğrafiyadan enerji almağa çalışırlar. Bu proses yeni enerji tərəfdaşlıqlarının formalaşmasına səbəb olur.

Azərbaycan Yaponiya üçün uzunmüddətli alternativ tədarükçülərdən birinə çevrilə bilər. Xüsusilə ölkənin siyasi sabitliyi, beynəlxalq enerji layihələrində təcrübəsi və ixrac infrastrukturunun mövcudluğu bu imkanları artırır. Bununla yanaşı, Azərbaycanın Asiya bazarında mövqeyinin güclənməsi üçün də əlavə imkanlar yaranır. Yaponiya kimi iri iqtisadiyyatla əməkdaşlıq digər Asiya ölkələrinin də Azərbaycan enerjisinə marağını artıra bilər”.

A.Nəsirli vurğulayıb ki, Yaponiya ilə enerji əməkdaşlığının genişlənməsi Azərbaycan üçün iqtisadi baxımdan da mühüm üstünlüklər yarada bilər:

“Yeni bazarlara çıxış ixrac gəlirlərinin artmasına, enerji satış coğrafiyasının genişlənməsinə və iqtisadi risklərin bölüşdürülməsinə kömək edir. Eyni zamanda bu əməkdaşlıq gələcəkdə enerji, logistika, texnologiya və investisiya sahələrində daha geniş iqtisadi əlaqələrin formalaşmasına şərait yarada bilər”.