Dünyəvilik insanların inanclarına hörmətsizlik göstərmək demək deyil. Əksinə, hüquqi dövlətin əsas vəzifələrindən biri fərqli inanclara malik insanların hüquqlarını qorumaq, onların dinc və təhlükəsiz şəraitdə yaşamasını təmin etməkdir.

Bu sözləri Axar.az-a açıqlamasında deputat Müşfiq Məmmədli deyib.

Onun sözlərinə görə, Azərbaycan xalqının tarixində islam dini, dini-mədəni irs və mənəvi dəyərlər mühüm yer tutur:

“Ölkəmizdə məscidlərin, ziyarətgahların və tarixi-dini abidələrin bərpası, dini icmalara dəstək göstərilməsi bu irsə münasibətin konkret ifadəsidir. Eyni zamanda, Azərbaycan tarixən müxtəlif dinlərin və mədəniyyətlərin nümayəndələrinin birgə yaşadığı məkan kimi tanınıb.

Azərbaycanın gücü onun dünyəvi dövlətçilik ənənələrini, milli-mənəvi irsini və tolerantlıq mədəniyyətini bir-birinə qarşı qoymadan qoruyub inkişaf etdirməsindədir. Məktəb və ailə də məhz bu dəyərlərin bilik, tərbiyə, qarşılıqlı hörmət və vətəndaşlıq məsuliyyəti əsasında gələcək nəsillərə ötürüldüyü məkandır.

Gələcəyimizi qorumağın ən etibarlı yolu savadlı, düşünən, milli köklərinə bağlı, hüquqlarını və məsuliyyətlərini dərk edən gənclər yetişdirməkdir. Bu vəzifənin yerinə yetirilməsi isə həm dövlətin, həm məktəbin, həm müəllimin, həm də ailənin ortaq məsuliyyətidir” , - o bildirib.