Yazıçılar Birliyinin balansında yerləşən məkanı “Kafe 26-lar” kimi çalışdıran Ramin Ruslan oğlu Məmmədovla YB arasında icarə müqaviləsinin surəti yayılıb.

Axar.az xəbər verir ki, Musavat.com-un yaydığı sənədlərdə müqavilənin 14 mart 2017-ci ildə 2,5 il müddətinə bağlandığı görünür. Müqavilənin şərtinə görə, Bakı şəhəri, Səbayıl rayonu, Xəqani küçəsi-53 binanın birinci mərtəbəsində Birliyə məxsus olan, xaqani küçəsinə baxan, sahəsi 230 kv/m ərazi icarəyə verilib.

İcarəçi hər ayın 25-dən gec olmayaraq, aylıq 8 min manat icarə haqqı verməyi üzərinə götürüb. Müqavilədə işıq və beynəlxalq danışıqlara aid telefon xərcləri də daxil olmaqla, bütün kommunal xərclərin icarəçi tərəfindən ödənilməsi də əksini tapıb.

Müqavilə icarəçi olaraq Ramin Məmmədov, icarəyəverən qismində AYB-nin katibi Çingiz Abdullayev imzalayıb.

Xatırladaq ki, adının “26-lar” olması birmənalı qarşılanmadığından, kafe 8 sentyabrda Bakı şəhər meri Hacıbala Abutalıbovun müdaxiləsi ilə qapadılıb.