"Jurnalist, ümumiyyətlə, məlumat verdiyi zaman faktlara əsaslanmalıdır. Hərbi sahədə olan məlumatlarda isə buna xüsusi diqqət verməlidir".

Bu sözləri Axar.az-a açıqlamasında media eksperti Zeynal Məmmədli Azərbaycan Prezidenti İlham Əliyevin dövlət sirri ilə bağlı məlumatların yayılmaması barədə son sərəncamını şərh edərkən söyləyib. O, jurnalist yanlışlarının əksər vaxt dövlət qurumlarının mətbuata məlumat verməməsindən qaynaqlandığını da bildirib:

"Azərbaycanın hazırkı durumunu hamımız anlamalıyıq. Jurnalist, ümumiyyətlə, məlumat verdiyi zaman faktlara əsaslanmalıdır. Hərbi sahədə olan məlumatlarda buna xüsusi diqqət verməlidir. Ancaq unutmaq lazım deyil ki, mətbuatın doğrunun açılmasına xidmət edən yalan siyasəti də var. Yəni siz heç bir açıqlama ala bilməsəniz, ictimai aktuallığı nəzərə alıb məlumatı yayırsınız. Bu məlumat yanlış çıxsa belə onu təkzibləyərkən böyük bir həqiqətin üstü açılmış olur.

Amma bu praktikanı heç bir halda hərbiyə aid etmək olmaz. Hərbi məlumatlar istisnadır. Jurnalistlər xüsusilə bu sahədə olduqca diqqətli olmalıdır. Həmçinin dövlət qurumları da bu sahədə jurnalistlərə dəstək verməlidir. Xatırlayırsızsa, bu məqam PA rəhbərinin təşkil etdiyi toplantıda da vurğulandı və mətbuat xidmətləri ilə bağlı xüsusi tapşırıq verildi. Gərək Müdafiə Nazirliyinin Mətbuat Xidməti jurnalistlərlə daha yaxşı işləsin. Jurnalistlər konfliktləri dərinləşdirməməlidir, mətbuat xidmətləri isə onlara müraciət edildiyi an media qurumu ilə əlaqəyə keçməli və sıx işləməlidir. Jurnalistlər olanlara xəbər verməli, rəsmi qurumlar isə buna münasibət bildirməlidir. Təkcə jurnalistlər deyil, dövlət qurumları da hərbi və dövlət sirri, prezidentin imzaladığı sərəncamla bağlı ciddi düşünməlidir. Yəni mediaya yönəlik bu sərəncam təkcə jurnalistlərə aid deyil. Bütün informasiya daşıyıcılarına və mənbələrə aiddir".

"Ayna-Zerkalo" qəzetinin baş redaktoru Elçin Şıxlı isə əsas məsələnin mediaya inamı geri qaytarmaqdan ibarət olduğunu söyləyib:

"Biz sosial şəbəkəni media adlandırırıq. Ancaq düşünürəm ki, sosial şəbəkəni media hesab etmək və bir çox məsələlərdə ona istinad etmək olmaz.

Təbii ki, mediadakı hərc-mərcliyə son qoyulmalıdır. Əsas məsələ sərəncamın verilməsindən sonra onun həyata keçirilməsi və işləməsini təmin etməkdir. İcra olunarsa, hesab edirəm, peşəkar jurnalistikaya, mediaya inamı yenidən bərpa etmək mümkün olar. Çünki qeyri-rəsmi, bəzən təsdiqlənməyən xəbərlərlə özümüz özümüzü məhv eləmişik".

Qeyd edək ki, bir müddət öncə Prezident İlham Əliyev dövlət sirri təşkil edən məlumatların KİV-də və sosial şəbəkələrdə yayılmasını qadağan edən sərəncam imzalayıb.