Bu gün Beynəlxalq Mətbuat Mərkəzində "Hüquqi biliklərin inkişafı və vətəndaşların yeni qanunlar ilə bağlı maarifləndirilməsi" layihəsi çərçivəsində yaradılan www.muvekkil.az hüquq saytının təqdimat mərasimi keçirilib.

Axar.az xəbər verir ki, təqdimatda çıxış edən Müvəkkil Hüquq Mərkəzinin sədri, hüquq müdafiəçisi Səməd Vəkilov Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə gerçəkləşdirilən layihənin başa çatdığını bildirib. S.Vəkilov əlavə edib ki, icra olunan layihənin əsas məqsədi vətəndaşların hüquqi biliklərinin artırılmasıdır:

"Bu istiqamətdə əsasən yeni qəbul olunmuş qanunların əhaliyə izah edilməsi, əhalinin ən çox istifadə etdiyi müvafiq icra hakimiyyəti orqanları tərəfindən qəbul olunan müraciət formalarının hazırlanması və digər hüquqi sənədlərin vətəndaşlara əlçatanlığını təmin edilməsi layihənin əsas vəzifələrindəndir. Qeyd olunan materiallar hazırlanaraq vahid bazada — www.muvekkil.az – hüquq portalında toplanıb. Belə ki, hüquq portalında yeni qəbul olunmuş 10 qanunvericilik haqqında informasiya, qanunların şərhi ilə bağlı 10 məqalə və əhalinin ən çox rastlaşdığı məsələlərlə bağlı 43 nümunəvi sənəd forması yerləşdirilib".

Koordinator S.Vəkilov əlavə edib ki, layihə bitdikdən sonra da qanunvericiliklə bağlı informasiya və materialların sayta daxil edilməsi nəzərdə tutulur.

Tədbirdə çıxış edən Qarabağ qazisi, jurnalist Rey Kərimoğlu, Milli Qəhrəman Mübariz İbrahimov adına "Gənc Nəqliyyatçılar" klubunun sədri Fuad Rəsul, "Digesta" Hüquq nəşriyyatının rəhbəri Ərşad Hüseynov və digər natiqlər də hüquq saytı və layihə ilə bağlı təkliflərini və fikirlərini bölüşdülər, hüquqi maarifləndirməyə ehtiyac olduğunu diqqətə çatdıraraq, bu kimi layihələrin və portalların vətəndaşlar üçün əhəmiyyətlini qeyd etdilər.