ABŞ Prezidenti Donald Tramp daha çox şəffaf siyasət aparmağın tərəfdarıdır. O, bir çox hallarda siyasətdəki qapalı gedişatları publikaya, rəyçilərə açır.

Bu sözləri Axar.az-a açıqlamasında Trampın ABŞ-a xeyir verəcəyi təqdirdə diktatorlarla görüşə biləcəyi ilə bağlı açıqlamasına münasibət bildirən politoloq İlqar Vəlizadə deyib. O bildirib ki, digər ABŞ liderləri bu əməllərinə don geyindirsələr də, Tramp bunu açıq şəkildə dünyaya bildirib:

“Bəlkə də Trampın bu siyasəti ondan irəli gəlir ki, o, vaxtilə şou-proqramlar aparıb. Eyni zamanda nəhəng media kampaniyalarının da başçısı idi. Ola bilər ki, Tramp şəffaflıq prinsiplərini gerçək siyasətdə də tətbiq edir. Lakin onun bu açıqlamasında yeni informasiya yoxdur. Tarixə də nəzər salsaq görərik ki, ABŞ-a müttəfiq ölkələrin başçılarının bir çoxu diktatorlardır. Bu diktatorlar isə amerikayönümlü siyasət aparıb. Məsələn, Misirin prezidenti olmuş Ənvər Sədat amerikayönümlü siyasət aparıb, bir çox ölkələrdə isə hərbi diktator sayılırdı. ABŞ liderləri illərlə tərəfdaşları olan müxtəlif ölkələrin diktatorları ilə yaxından münasibət qurublar. Hətta bunu bəzən gizlətmirdilər. Sadəcə olaraq, bu əməllərinə başqa don geyindirirdilər və özlərinə bəraət qazandırırdılar. Tramp isə onlardan fərqli olaraq, həmin şəxslərin diktator olmasını və onlarla münasibətlərini açıq şəkildə deyir”.

Qeyd edək ki, ABŞ Prezidenti Donald Tramp ABŞ-a xeyir verərsə, diktatorlarla görüşə biləcəyini deyib.