"Azərbaycanda broyler toyuqları birmənalı şəkildə genetik modifikasiya olunmuş (GMO) yemlərlə qidalandırılır".

Bu sözləri Axar.az-a açıqlamasında Azad İstehlakçılar Birliyinin sədri Eyyub Hüseynov broyler toyuqlarının insan sağlamlığına zərər verməsi məsələsinə aydınlıq gətirərkən deyib. O, broyler toyuqlarının insan sağlamlığına ciddi zərər vurduğunu bildirib:

"Broyler toyuqları zərurətdən yaranıb və arzuolunmaz toyuqlar hesab olunur. Onları yetişdirmək üçün təbii ki, dərmanlardan və antibiotiklərdən istifadə edilir. Bunlar da öz növbəsində insanların sağlamlığına mənfi təsirini göstərir. Lakin bunu sübut etmək elə də asan iş deyil. Biz Azərbaycanda broyler şirkətlərinin sadəcə toyuq yemlərinin monitorinqini aparmışıq. Araşdırmalarımız zamanı məlum olub ki, broyler toyuqlarının qidalandırılmasında genetik modifikasiya olunmuş yemlərdən istifadə olunur. Lakin Azərbaycanda bu istiqamətdə laboratoriya olmadığı üçün broyler toyuqlarına vurulan antibiotiklərin miqdarını müəyyənləşdirmək hələlik mümkün deyil. Buna görə də insanlar sağlamlıqları üçün narahat olurlar. Broyler toyuqları birmənalı şəkildə əhalinin sağlamlığına ciddi zərbə vurur".

Araşdırmalara başlanılıb

"Məsələdən xəbərdarıq, saytlarda yayılan videonu görmüşük. Bununla bağlı Standartlaşdırma, Metrologiya və Patent üzrə Dövlət Komitəsi yanında Texniki tənzimləmə və standartlaşdırma üzrə dövlət nəzarəti xidmətində araşdırmalara başlanılıb".

Bu sözləri isə "Modern.az" saytına Standartlaşdırma, Metrologiya və Patent üzrə Dövlət Komitəsi mətbuat xidmətinin rəhbəri Fazil Talıblı bildirib.

O qeyd edib ki, hər şeyin aydınlığa qovuşması üçün vaxt və əlavə informasiya lazımdır: "Hesab edirik ki, məsələyə hüquqi müstəvidə baxılmalıdır. Bu çəkilişi həyata keçirən və onu Yutubda yerləşdirənin kimliyi müəyyən olunmalıdır. Bunun vasitəsilə də ünvan dəqiqləşməlidir".

Komitə rəsmisi deyib ki, yayılan videonun təxribat xarakterli olması istisna deyil:

"Bu video real da ola bilər, təxribat da, provokasiya xarakteri də daşıya bilər, yerli məhsulların keyfiyyətinə şübhə yaratmaq istəyi də ola bilər. Bu, təkcə bizim komitədə yox, müvafiq instansiyalarda da araşdırılmalıdır. Araşdırma başlayıb və nəticələr barədə mütləq ictimaiyyətə açıqlama verəcəyik".

Qeyd edək ki, Axar.az-ın elektron ünvanına toyuqlara iynə vurmaqla onun necə şişirdilməsini əks etdirən görüntülər göndərilib. Görüntülərdən aydın olur ki, gündəlik istifadə olunan toyuq məhsullarının tərkibinə onun çəkisini artırmaq üçün zərərli maddələr vurulur. Elə bu səbəbdəndir ki, əhali arasında kökəlmə və digər xəstəliklər çoxalır. İmmun zəifləməsi müşahidə edilir ki, bu da xəstəliklərə yol açır. Hətta bu toyuqların xərçəng xəstəliyi də yaratdığı iddia olunur.