"Rza Zərrab heç vaxt Azərbaycan vətəndaşı olmayıb".

Bunu "Hürriyet" qəzetinə açıqlamasında Azərbaycanın Türkiyədəki səfirliyinin mətbuat müşaviri Elsevər Salmanov deyib və Rza Zərrabın türk mediasında Bakı doğumlu olaraq təqdim edilməsinə etirazını bildirib.

"Bu şəxs Bakıda doğulmayıb. Azərbaycanın dövlət orqanlarında bu barədə hər hansı sənəd yoxdur. O, nə keçmişdə, nə də indi Azərbaycan vətəndaşı olub. Gələcəkdə də ola bilməz".

Xatırladaq ki, ötən gün "Axar.az" olaraq Azərbaycanın Türkiyədəki səfirliyinə müraciət etmiş və türk mediasının Rza Zərrabı "1984-cü il, Bakıda zəngin ailədə doğuldu" kimi təqdimatına münasibətini öyrənməyə çalışmışdıq. "Rüşvət əməliyyatı"nın əsas adamlarından sayılan bir şəxsin iranlı soydaşımız kimi deyil, Azərbaycan vətəndaşı kimi təqdim edilməsini araşdırdıqlarını bildirən E.Salmanov araşdırma bitən kimi buna etirazlarını bildirəcəklərini qeyd etmişdi.