Rusiyanın məşhur teleaparıcısı Vladimir Solovyov "Tam əlaqə" (Polnıy kontakt) şousunda Arma kompyuter oyununun kadrlarını Ermənistan-Azərbaycan döyüş əməliyyatları zonasından sənədli video kimi təqdim edib.

Axar.az xəbər verir ki, ötən dəfə efirdə erməni əsgərlərinin cəbhəyə yola salınması adı altında Bakıda çəkilmiş kadrların nümayiş etdirildildiyini aşkarlayan Solovyov çəkiliş qrupunu tənbeh etsə də, bu dəfə, o, saxta videonu şərh edib.

"Bu, göründüyü kimi, təyyarəni vurmağa çalışarkən çəkilən hərbi-hava döyüşünün fraqmentləridir. Videoya baxdığın zaman döyüşü "Ulduz müharibələri"nə bənzədirsən, bir növ gözəllik kimi qəbul edirsən. Başa düşmürsən ki, bax, belə görüntünün arxasında insan həyatı dayanır. Əslində, dəhşətlidir — Rusiya sərhədindən 80 km məsafədə müharibə gedir", – deyə o videonu şərh edərkən bildirib.

Tvitter sosial şəbəkəsinin istifadəçilərindən biri görüntülərin saxta olmasını aşkarlayaraq, təqdim olunan çarxın Arma3 kompüter oyununa məxsus olduğunu və Yutubda milyonlarla baxış toplamış Çin blogerinin paylaşımından götürüldüyünü sübut edib.