Öncə qeyd edim ki, Robert Köçəryanın vəziyyətinə baxıb onun düşdüyü aciz durumdan fərəh hissi duydum. Milyonların qarşısında əzilmiş, ruhu ölmüş bir insan təsiri bağışladı.

Axar.az xəbər verir ki, bu sözləri Bakı Politoloqlar Klubunun sədri Zaur Məmmədov Ermənistanın sabiq prezidenti Robert Köçəryanın Rusiyanın “Birinci kanalı”nda yayımlanan “Pozner” verilişinə müsahibəsi haqda fikirlərini bölüşərkən deyib.

Politoloq qeyd edib ki, Ordumuz tərəfindən sındırılmış Köçəryanın Poznerə verdiyi müsahibə haqda ilkin nəticələr bunlardır:

“1. Robert seçkiqabağı kampaniyanı Rusiyanın “Birinci kanalı”na müsahibə ilə başladı. Müsahibənin efirə verilməməsi üçün Paşinyan komandası kanalın rəhbərliyi ilə əlaqə saxlamış, lakin məqsədə çatılmamışdı.

2. Köçəryan Türkiyəni Ermənistan üçün 1 nömrəli təhdid adlandırmış və bildirmiş ki, əgər sərhədlər açılarsa, Ermənistan Acarıstanın gününə düşəcək, Ankaranın ciddi iqtisadi ekspansiyası ilə qarşılaşacaq.

3. Revanş haqqında suala cavab verən Köçəryan dağılmış erməni ordusu ilə yeni müharibənin qeyri-mümkün olacağını qeyd edib.

4. Qarabağın gələcəyi haqqında danışarkən keçmiş DQMM ərazisinin danışıqlar yolu ilə bərpa ediləcəyinə ümid etdiyini bildirib. Qeyd edib ki, hələ heç də Qarabağla bağlı hər şey itirilməyib.

5. Müharibənin başlamasında Nikolu günahlandırıb. Madrid prinsipini öz istəyi kimi şərh edərək, vaxtilə ətraf rayonları “dqr” statusu müqabilində qaytarmağa hazır olduğunu qeyd edib.

Beləliklə, seçkiqabağı kampaniyasının ilk müsahibəsində Robert Putinin xoşuna gəlməyə çalışıb, “dqr”in statusundan, revanşdan danışmayıb. Müharibəyə qədər sinəsinə döyən və özündən razı şəkildə Qarabağdan danışan Köçəryan bu dəfə “quzu”ya dönüb, “mənəm mən” deyə bilmədi”.

Z.Məmmədov vurğulayıb ki, rus mediasının Köçəryanın Moskvaya səfərini diqqətdə saxlaması seçkilərin gərgin keçəcəyindən xəbər verir:

“Aprelin 7-si Paşinyanın Putinlə görüşü yəqin ki, Nikolun taleyini həll edəcək.

O ki qaldı Poznerə, proqramın əvvəlində onun Köçəryanı keçmiş və qondarma “dqr”in “birinci prezidenti” adlandırması və bunun efirə verilməsi kanala müsbət heç nə vəd etmir!”

Qeyd edək ki, Pozner Gürcüstanın ərazi bütövlüyünə şübhə etdiyi üçün Tiflisdən yumurta atəşi ilə yenicə qovulub.