Azərbaycan, Fransa, Avropa İttifaqı Şurası prezidentləri və Ermənistanın baş nazirinin dünən videoformatda keçirilən görüşünü Brüssel görüşünün davamı hesab etmək olar. Makron da görüşün keçirilməsinə Minsk Qrupunun həmsədri kimi deyil, Avropa İttifaqının sədri kimi təşəbbüs göstərib. Fikrimcə, burada əsas məqam müzakirə olunanlardan daha çox, müzakirə olunmayan mesajlardır.

Bu sözləri Axar.az-a açıqlamasında politoloq Fərhad Məmmədov deyib. Politoloq əsas diqqəti görüşdə post-müharibə dövründən sonrakı məsələlərin müzakirəsinə çəkib:

“Burada ən önəmli məqam “Dağlıq Qarabağ” ifadəsindən istifadə olunmaması, Minsk Qrupuna istinad edilməməsi, eyni zamanda müzakirə olunan məsələlərin hamısının 44 günlük Vətən müharibəsindən sonrakı dövrə aid olmasıdır. Digər tərəfdən görüşün nəticəsi kimi həm Azərbaycana, həm də Ermənistana UNESKO-nun missiyalarının göndərilməsi də vacibdir. Bu o deməkdir ki, Azərbaycanda erməni mədəniyyətinə, Ermənistanda isə xalqımızın mədəni irsinə aid tarixi abidələr və s. araşdırılacaq. UNESKO nümayəndə heyəti Qarabağa Azərbaycan ərazisindən keçməklə gedəcək. Fikrimcə, ortaya çıxan nəticələri və dünən keçirilən görüşü Azərbaycanın qazandığı zəfərlə bölgədə yaratdığı geosiyasi reallıq çərçivəsində dəyərləndirmək lazımdır”.