Rusiya bilmir ki, onun Əsədin hakimiyyətdə saxlanılması ilə bağlı başladığı danışıqlar əvvəlcədən uğursuzluğa düçar olub.

Axar.az xəbər verir ki, bu sözlər ABŞ-ın "kölgə Mərkəzi Kəşfiyyat İdarəsi" kimi tanınan nüfuzlu "Stratfor" tədqiqat mərkəzinin sonuncu hesabatında yer alıb. Təşkilat Suriyanın Rusiya üçün faydalı olmayacağını bildirib:

"Özünün Suriyadakı hərbi mövcudluğunu artırmaqla Moskva problemlərini həll etməyə çalışır. Hazırda Rusiya özünün dünya siyasətində müstəqil oyunçu olduğunu sübut etməyə çalışır. Bu işdə isə Moskva Suriyanı digər dünya liderləri ilə danışıqlarda rıçaq kimi istifadə edir. Moskva üçün bu siyahıda ilk yerdə İsrail gəlir. İsrail Baş naziri Benyamin Netanyahu bazar ertəsi Rusiya Prezidenti Vladimir Putinlə üç saatlıq görüş üçün Moskvanı ziyarət etdi. Onların ümumi mətbuat konfransı kifayət qədər gərgin idi. Netanyahu Suriya ilə İranı Hizbullaha silah verməklə İsrailə qarşı Qolan təpələrində ikinci cəbhə açmaq istəmələrində günahlandırdı. Bu, Tel-Əvivə şərait yaradır ki, Suriya ərazisindəki hərbi hədəflərə hücum etsin.

Putin öz növbəsində həmin konfransda bəyan etdi ki, Suriya Hizbullahı silahla təchiz etmir. Başqa cür desək, Rusiya terrorçuları silahla təchiz etmir və silahları yalnız Suriyadakı hökumət qüvvələrinə göndərir. Bir şeyi də qeyd etmək lazımdır ki, Rusiyanın İsraillə münasibətləri qeyri-stabil vəziyyətə çatıb. Hər iki tərəf öz opponentinin "arxa həyətindəki" işlərə qarışmaqdan çəkinmir. İsrail bir çox postsovet ölkələri ilə müdafiə və kəşfiyyat sahəsində əməkdaşlıq edir. Rusiya isə artıq çoxdan Suriya və İrana siyasi və hərbi dəstək göstərir. Hər iki tərəf bilir ki, nə zaman dayanmaq lazımdır. Rusiya Gürcüstanda müharibəni başladandan cəmi üç gün sonra İsrail rəsmən Tiflisə silah göndərməyi dayandırdı. Eyni şəkildə Rusiya da beş günlük müharibə zamanı Suriya Prezidenti Bəşər Əsədə silah verməyi saxlamışdı. Moskva İsraildən güzəştlər əldə etmək istəyir. Kreml nəzərə alır ki, İsrail hərbçiləri Ukrayna ordusunu ölkənin şərqində separatçılarla mübarizə üçün hazırlayır. Rusiya həmçinin İsrailin Ukraynaya pilotsuz təyyarələr və digər hərbi aparatlar göndərməsini istəmir. İndi də 2008-ci ildə olduğu kimi, Rusiya Tel-Əvivlə razılaşmada maraqlıdır".

"Stratfor" İsraillə bərabər, Türkiyənin də Rusiya üçün əsas rəqib olduğunu bildirib:

"Burada həmçinin digər regional lider olan Türkiyənin də maraqlarını gözdən qaçırmaq gərək deyil. Koalisiya üzvlərindən fərqli olaraq, Türkiyə Suriya dövlətinə qarşı anti-islam kampaniyasında maraqlıdır. Türkiyə Suriyada hakimiyyətə sünnilərin nümayəndəsini gətirmək istəyir və ya ən azından ölkənin şimalında daha etibarlı təsir vasitəsi yaratmağa ümid edir. Ankara qiyamçıların əsas müttəfiqi hesab edilir. Bundan başqa Rusiya aviasiyasının Suriyada peyda olması Türkiyənin uçuşa qadağan zona yaradılması planlarına ciddi zərbə vurub. Məhz bu səbəblərə görə, Ərdoğan Moskvaya Putinlə danışıqlara getmək məcburiyyətində qalmışdı. Ankaranın Moskva ilə gərgin münasibətləri təkcə Suriya ucbatından yaranmayıb. Son aylar Rusiya Türkiyənin Qafqazda əsas müttəfiqi olan Azərbaycanla danışıqlar aparır. Bəzi mənbələrə görə, bu danışıqlar sayəsində Moskva və Bakı Azərbaycanla Ermənistan arasında yaranmış Dağlıq Qarabağ konfliktini tam həll etməyə çalışırlar. Bundan öncə Bakının konfliktin həllində hərbi zəmanətçisi kimi Ankara çıxış edirdi, lakin indi Rusiya tam şəkildə regiondakı situasiyanı nəzarət altına almağa çalışır. Moskva həmçinin Suriya və Dağlıq Qarabağdakı konfliktlərini bir müddət dayandırılmış "Türk axını" proyektinin inkişaf etdirilməsi üçün Türkiyəyə təzyiq vasitəsi kimi istifadə etməyə çalışacaq".

Təşkilat həmçinin Moskvanın Suriya konflikti vasitəsilə Vaşinqtonun bölgədəki maraqlarına zərbə vurmağa çalışdığını qeyd edib:

"Soyuq müharibə dövründən sonra ABŞ və Rusiya münasibətləri özünün ən ağır dövrlərini yaşayır. Moskva və Vaşinqton arasında Ukrayna böhranı və Rusiya əleyhinə sanksiyaların ləğv edilməsindən başqa Kerri ilə Lavrov arasında heç bir şey müzakirə edilmir. Ona görə də Rusiya Suriyaya müdaxilə etməklə ABŞ-ın Rusiya ilə mütəmadi danışıqlara getməsinə çalışır. Moskvaya çox şey lazımdır. Rusiya gələcəkdə Ukrayna və Qərb sanksiyalarının ləğvi ilə bağlı indidən zəmin hazırlamağa çalışır. Moskvada bilirlər ki, bu uzun zaman aparacaq, amma öz məqsədlərinə 1-2 il ərzində çatacaqlarına hələ də ümid edirlər".