Hazırda Rusiyanın bir çox tanınmış KİV nümayəndələri ilə Bakıda fikir mübadiləsi aparılır. Rusiyada erməni lobbisinin yaydığı qərəzli məlumatlardan sonra Bakıda fikirləri 180 dərəcə dəyişən Rossiya, NTV, ORT telekanallarının jurnalistləri ilə çox maraqlı söhbətlərimiz oldu.

Bu barədə Axar.az-a Rusiyanın tanınmış KİV nümayəndələri ilə aparılan görüşlərdə yaxından iştirak edən politoloq İlqar Vəlizadə danışıb. Politoloq aparılan danışıqların çox məhsuldar keçdiyini deyib:

"Hazırda Rusiyanın tanınmış KİV nümayəndələri Bakıdadır. Rusiya və Azərbaycan arasında münasibətlər kontekstində davam edən fikir mübadilələri çox maraqlı keçir. Görünür, Azərbaycana maraq olduqca böyükdür. Xüsusilə də son proseslər, Rusiyanın Azərbaycana olan diqqəti oradakı auditoriyanın bu marağını daha da artırıb. Rusiya cəmiyyətində Azərbaycanla bağlı çoxlu şayiə və doğru olmayan məlumatların erməni lobbisinə işlədiyinə toxunan KİV nümayəndələri Bakıya gəldikdən sonra fikirlərinin 180 dərəcə dəyişdiyini bildiriblər. Bu, Azərbaycan üçün çox yaxşı bir haldır. Çünki Rusiyada erməni lobbisinə işləyən ermənipərəst ekspertlər Azərbaycanı nüfuzdan salmaqdan ötrü hazırda dəridən-qabıqdan çıxırlar. Səbəb isə Rusiyanın Azərbaycana artan diqqətidir. Bu fonda erməni diasporu ölkələrinin Rusiyanın gözündə heçə enməsindən olduqca narahatdır. Rus jurnalistlər Bakıda rus dilinin yüksək səviyyədə inkişafından təəccübləndiklərini dilə gətirərək Ermənistan və Gürcüstanın bu məsələdə Azərbaycandan geridə qaldığını bildiriblər. Bu istiqamətdə fikir mübadiləsi və görüşlərimiz davam etdiriləcək".