Bu gün multikultural cəmiyyətlər artıq nağıl deyil, reallıqdır.

Axar.az-ın xəbərinə görə, bunu italiyalı jurnalist Ciuliano Bifolkini "Azərbaycan multikulturalizmi ölkənin əsas güc elementi kimi" sərlövhəli yazısında qeyd edib.

İtaliyanın "Opinion Publika" saytında dərc olunan məqalədə bu məfhumun Azərbaycan modelinə nəzər salınması tövsiyə olunub. Müəllifin sözlərinə görə, bu ölkədə müxtəlif mədəniyyətlərin və dinlərin nümayəndələri, etnik azlıqlar harmoniya halında yaşayırlar.

C.Bifolki Bakıya səfəri çərçivəsində Beynəlxalq Multikulturalizm Mərkəzində olub və qurumun nümayəndələri ilə ölkəmizdə mövcud multikultural mühit, müvafiq sahənin hüquqi aspektləri, Azərbaycanda yaşayan müxtəlif xalqların mədəni, dini hüquqlarının qorunması istiqamətində tənzimlənmə mexanizmi kimi mövzular ətrafında söhbət aparıb.

Mərkəzin şöbə müdiri Nəriman Qaşımoğlu bildirib ki, Azərbaycanda tarixin bütün dövrlərində müxtəlif millətlər bir arada yaşayıb. Ölkəmiz bu çoxmillətlilik mühitindən heç vaxt narazı olmayıb, əksinə müxtəlif sivilizasiyaların qovuşduğu məkan rolunu oynayıb.