Xırdalanda 9-cu sinif şagirdini zorlamaqda təqsirli bilinənlər azadlığa buraxılmayıb. Onlar Bakı İstintaq Təcridxanasında saxlanılır.

Bu barədə Axar.az-a təqsirləndirilən şəxslərin vəkili Ceyhun Yusifov mətbuatda o gənclərin məhkəmə zalından azadlığa buraxılması barədə xəbərlərə münasibət bildirərkən deyib.

Vəkilin sözlərinə görə, Sumqayıt Apelyasiya Məhkəməsində hakim İlham Həsənov ittiham edilən Elməddin Qədirli, Nicat Ağayev, Elşən Novruzov və Maqsud Şamiyevə Cinayət Məcəlləsinin 150.2.1 (seksual xarakterli zorakılıq hərəkətləri bir qrup şəxs tərəfindən törədildikdə) maddəsi üzrə bəraət verib. C.Yusifov qeyd edib ki, məhkəmə onları 182.2.1 (hədə-qorxu ilə tələb etmə, qabaqcadan əlbir olan bir qrup şəxs tərəfindən törədildikdə) və 182.2.2-ci (hədə-qorxu ilə tələb etmə təkrar törədildikdə) maddələrlə təqsirli bilib və gənclər məhkumluq həyatına davam edirlər.

Vəkil bu maddələr üzrə işə baxılması üçün Ali Məhkəməyə müraciət olunacağını da açıqlayıb: "Vəkil həmkarlarım - Gülşən Salmanova, Günay Sultanova, Əbil Həsənov və Əziz Qənbərovla birlikdə təqsirsiz 4 yeniyetmənin həyatında böyük iz buraxan zorlama ləkəsini silməyə nail olduq. Çünki onların məktəbli qızı zorladığı sübuta yetirilmədi, heç bir video-fakt ortaya qoyulmadı".

İttiham aktına görə, 2014-cü il dekabrın 9-da təqsirləndirilən şəxslər seksual xarakterli zorakılıq hərəkətlərini Abşeron rayonu ərazisində törədiblər.

Orta məktəbin yuxarı sinfində oxuyan 4 nəfər eyni məktəbin 9-cu sinfində təhsil alan Sevdanı (ad şərtidir) zorlayıblar və bu əməllərini videokamera ilə lentə alıblar.

Bundan sonra həmin şəxslər videokadrlar vasitəsi ilə qıza hədə-qorxu gələrək, onu şantaj ediblər. Baş vermiş hadisə ilə əlaqədar zərərçəkən valideynləri ilə birgə polisə müraciət edib.

Bakı Ağır Cinayətlər Məhkəməsinin hökmü ilə Elməddin Qədirli 6 il 6 ay, digər təqsirləndirilən şəxslərin hər biri 5 il 6 ay müddətinə azadlıqdan məhrumetmə cəzasına məhkum olunublar. Təcavüzlə bağlı bəraət alsalar da, gənclərin aldığı cəza digər maddələrlə qüvvədə saxlanılıb.

Zərərçəkmiş tərəfin mövqeyini öyrənmək üçün araşdırmalarımız davam edir.