Rusiyanın "Layfnyus" telekanalının çəkiliş qrupu Azərbaycandan deportasiya olunub.

Virtualaz.org bildirir ki, bunu Azərbaycan Xarici İşlər Nazirliyi mətbuat xidmətinin rəhbəri Hikmət Hacıyev deyib.

Onun dediyinə görə, telekanalın jurnalistləri Azərbaycanda heç bir rəsmi akkreditasiya olmadan çalışıblar və Dağlıq Qarabağ münaqişəsi ilə bağlı təxribat xarakterli, yalan məlumatlar yayıblar.

"Onlar Azərbaycana qarşı təxribatla məşğuldular, Dağlıq Qarabağ münaqişəsi barədə yanlış məlumatlar yayırdılar. Bunu nəzərə alaraq həmin jurnalistlərin ölkəmizin ərazisində olması qeyri-qənaətbəxş sayılıb", - H.Hacıyev deyib.

Qeyd edək ki, "Layfnyus" telekanalının çəkiliş qrupunun Tərtərdən hazırladığı reportaj təxribatlara yol vermişdi. Rayon sakinlərinin birindən müsahibə alan telekanal onun sözlərini rus dilinə tamam başqa variantda tərcümə edib. Televiziya rayon sakininin sözlərini ermənilərin hər gün atəş açdığını, guya bu müharibənin onlara lazım olmadığını, bu gecə əhalinin avtomobillərdə gecələmək üçün rayon çıxışına daha çox maşınlarla gələcəyi kimi tərcümə edib.

Bu telekanalın rəhbəri erməni Aşot Qabrielyandır.