Cəbhədə baş verən son hadisələr zamanı Rusiyanın hətta nisbətən azad və demokratik hesab etdiyimiz media qurumları belə Azərbaycana qarşı soyuq və psixoloji müharibə aparırdılar.

Bunu Axar.az-a açıqlamasında media eksperti Qulu Məhərrəmli deyib.

O, son günlərdə cəbhədə baş verən hadisələrin dünya mediasında hansı formada yayımlanmasını şərh edib:

"Türkiyə mediası cəbhədə baş verən son hadisələrə bir qardaş baxışından yanaşdı və bu aspektdən çıxış etdi. Rusiya mediası barəsində isə bunları demək çox çətindir. Çünki Rusiyanın hətta nisbətən azad və demokratik hesab etdiyimiz media qurumları belə (Exo Moskva – red.) Azərbaycana qarşı soyuq və psixoloji müharibə aparırdılar. Bizimlə müharibə edən dövlətin arxasında dayanan Rusiyanın media orqanlarında Azərbaycan əleyhinə materiallar yayımlandı. Onlar Azərbaycanı hətta işğalçı, terrorçu kimi yaramaz ifadələrlə təhdid eləməyə çalışdılar. Qərb mediası isə daha çox balanslı, yəni həm Azərbaycan, həm də erməni mənbələrinə istinadən xəbərlər verdi. Xüsusilə, hadisələr işıqlandırılan zaman Azərbaycanın ərazi bütövlüyü məsələsi, BMT-nin və Avropa Şurasının Qarabağ münaqişəsinə baxışlarını əks etdirən mövqe ön planda oldu. Azərbaycan ərazilərinin işğal faktı dönə-dönə vurğulandı".

Ekspert bildirib ki, Azərbaycan bu informasiya müharibəsini özü tənzimləməlidir:

"Ümumiyyətlə, hazır, çevik qurumlar olmalı, müasir texnologiyaya əsaslanmalı və bugünkü medianın standartlarına uyğun xəbərlər yayımlanmalıdır. Biz təbliğatla dünya mediasına veriləcək informasiyaların fərqini bilməliyik. Azərbaycan özü bu müharibəyə hazır olmalıdır. Müdafiə Nazirliyi bu dəfə normal məlumatlar çatdıra bildi. Ümumiyyətlə, bizim beynəlxalq imici olan informasiya qurumlarımız olmalıdır ki, dünya mediası onlara istinad etsin və onların yaydığı məlumatları versin. Bu baxımdan gələcəyi nəzərə almalıyıq".

Media eksperti Ələsgər Məmmədli də Rusiya mətbuatının Azərbaycan əleyhinə yanlış informasiyalar verdiyini bildirib:

"Türkiyə son hadisələr zamanı birmənalı olaraq, Azərbaycanın haqlı mövqeyini dəstəklədi. İstər media, istər siyasi elitası, istərsə də hökuməti ciddi şəkildə Azərbaycana dəstək verdi. Rusiya mətbuatı isə birmənalı olaraq sinifdə qaldı. Çünki Rusiya mətbuatı tamamilə yalan, Azərbaycana məxsus informasiyaları dəyişdirib, ermənilərin adına verən, Azərbaycanın xəritəsini, münaqişənin mahiyyətini təhrif edən məlumatlar yayımladı. Ümumiyyətlə, başdan-sona sırf Ermənistan mənbəsinə istinadən hərəkət edərək, cəmiyyətini o istiqamətdə köklədi. Təsadüfi deyil ki, teledebatlarda, ictimai müzakirələrdə Azərbaycanın mövqeyini müdafiə edənlər çox ciddi hücumlara məruz qaldı. Ayrıca buraya gələn jurnalistlər də tərəfli informasiyalar verməyə çalışdı. Qərb mətbuatı isə həmişəkindən fərqli olaraq, bu dəfə daha obyektiv oldu. Düzdür, orda da müəyyən problemlər vardı, lakin ümumi götürəndə, Azərbaycanın ərazi bütövlüyünün BMT-nin qətnamələri və AB tərəfindən vurğulandığı, konfliktin Azərbaycanın ərazi bütövlüyü çərçivəsində öz həllini tapmalı olduğu sistemli şəkildə Qərb mətbuatının informasiyalarında qeyd edilirdi. Qərb mətbuatı bu dəfə obyektivliyə daha yaxın idi".