Azərbaycan Baş nazirinin müavini Şahin Mustafayevlə İranın neft naziri Möhsün Paknejad Tehranda keçirdikləri görüşdə energetika sahəsi başda olmaqla ikitərəfli əməkdaşlığın sürətlənməsi məqsədilə birgə işçi qrupun formalaşmasına dair fikir mübadiləsi aparıblar.

Axar.az xəbər verir ki, bu barədə “Mehr” agentliyi məlumat yayıb.

Görüş zamanı M.Paknejad bildirib ki, neft və enerji sektoru iqtisadi əlaqələrin inkişafı üçün oxlardan biridir.

O bu sahədə əməkdaşlıq səviyyəsinin artırılması ilə bağlı istənilən təşəbbüsləri alqışladıqlarını söyləyib.

Nazirin sözlərinə görə, bu cür əməkdaşlıq lazımi infrastruktur tələb edir.

Şahin Mustafayev isə vurğulayıb ki, İrana səfərinin məqsədi iki ölkə arasında münasibətləri nəzərdən keçirmək və gələcək layihələrin həyata keçirilməsi ilə bağlı danışıqlar aparmaqdır.

Xatırladaq ki, Ş.Mustafayev Tehranda İran Prezidenti Məsud Pezeşkian, xarici işlər naziri Abbas Arakçı və digər rəsmilərlə görüşüb.