18:25

İmişli rayonunda tərəvəz istixanasında yanğın başlayıb.

Axar.az xəbər verir ki, yanğın saat 16 radələrində başlayıb. Araz çayının kənarında yerləşən istixanada başlayan alov anidən güclənib.

Dərhal hadisə yerinə İmişli rayon Yanğından Mühafizə Bölməsinin texnikaları və canlı qüvvəsi cəlb edilib. Yanğının söndürülməsi üçün tədbirlər görülür.

***

İmişli rayonunda tərəvəz istixanasında baş verən yanğın söndürülüb.

Əraziyə İmişli rayon Yanğından Mühafizə Bölməsinin texnikaları və canlı qüvvəsi, Təcili Təxirə Salınmaz Tibbi Yardım heyəti və hüquq-mühafizə orqanlarının əməkdaşları cəlb edilib. Alov söndürülüb, yanğının ətraf ərazilərə keçməsinin qarşısı alınıb.

Yanğın zamanı bir nəfərin öldüyü bildirilib.

Faktla bağlı araşdırma aparılır.

***

İmişli rayonunda istixanada baş verən yanğınla bağlı TƏBİB açıqlama verib.

TƏBİB-dən bildirilib ki, 25 dekabr saat 16:20-də İmişli rayonu ərazisində baş verən yanğın hadisəsi nəticəsində 1971-ci il təvəllüdlü şəxs (kişi cinsli) İmişli Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub.

Ona aşağı, yuxarı ətrafların üz nahiyəsinin 2-ci, 3-cü dərəcəli termiki yanığı diaqnozu təyin olunub və ilkin zəruri tibbi xidmətlər göstərilib.

Hazırda həmin şöbədə müalicəsi davam etdirilən şəxsin vəziyyəti stabil qiymətləndirilir.

Qeyd edək ki, 1979-cu il təvəllüdlü şəxsin (kişi cinsli) hadisə yerində ölüm faktı qeyə alınıb.