Bədii Gimnastika üzrə FIG Dünya Kubokunun finalı bu gün - iyulun 22-də start götürür.

Axar.az xəbər verir ki, iyulun 24-ə qədər davam edəcək yarışların ilk iki günü, 26 gimnast və 9 qrup hərəkətləri komandası medallar uğrunda çoxnövçülükdə mübarizə aparacaq. Kubokun son günü ayrı-ayrı alətlər üzrə final mərhələləri baş tutacaq.

Bu il Dünya Kubokunun 9 mərhələsi keçirilib. Bakı finalında öncəki mərhələlərdə göstərilmiş ən yaxşı 4 nəticəyə əsasən, birinci yeri tutan gimnastlar və qrupların xüsusi mükafatlandırma mərasimi keçiriləcək.

Bu dəfə də, bədii gimnastika həvəskarlarının quruluşu milli yığma komandanın baş məşqçisi Mariana Vasilyevaya məxsus möhtəşəm açılış (22 iyul) mərasimi, həmçinin məşhur idmançılarla yanaşı, Azərbaycan gimnastikasının gələcəyi olan gənc gimnastların çıxışlarının da nümayiş olunacağı ənənəvi Qala-konsert (24 iyul) gözləyir.