Əfsuslar olsun ki, məğlub olduq. Belə nəticəni heç istəməzdik. Səhvlərimiz kifayət qədər idi. Amma hər şeyə baxmayaraq, meydanda mübarizə aparan kollektiv gördüm.

Axar.az xəbər verir ki, bu sözləri “Qarabağ”ın baş məşqçisi Qurban Qurbanov UEFA Konfrans Liqasının pley-off mərhələsində Bakıda Niderlandın “Tvente” komandasına 1:4 hesabı ilə uduzduqları cavab oyunundan sonra təşkil olunmuş mətbuat konfransında deyib.

Mütəxəssis inkişaf etmək üçün çalışacaqlarını söyləyib:

“İş saatlarımızı artırmalı, daha çox çalışmalıyıq. Hücum xəttimiz daha sürətli olmalıdır. Bu oyunda hücumla bağlı çatışmazlıqlarımız oldu. Bu istiqamətdə özümüzü inkişaf etdirməliyik. Komandanın formalaşması üçün müəyyən vaxta ehtiyacımız var. Heyət yenidir və bəlkə də dekabr ayında tam olaraq formaya düşəcəyik. Komandanı gücləndirməyə çalışırıq. Futbol günü-gündən inkişaf edir. Biz də çalışırıq ki, inkişaf edək və çatışmazlıqlarımızı aradan qaldıraq”.

Q.Qurbanov çempionatda yüksək hədəflər uğrunda mübarizəyə davam edəcəklərini bildirib:

“Çempionatımızın səviyyəsi hər mövsüm artır. Biz də yolumuza davam edəcəyik”.

Qeyd edək ki, “Qarabağ” evdə “Tvente”yə 1:4 hesabı ilə uduzaraq avrokuboklarda mübarizəni dayandırıb. Ağdam klubu ilk matçda minimalhesablı qələbə qazanmışdı – 1:0.