"Bakı-2015" Avropa Oyunları Almaniyanın SPORT1 idman kanalı ilə beynəlxalq yayım haqqında müqavilə imzalayıb.

Axar.az xəbər verir ki, müqaviləyə görə, SPORT1 telekanalı Almaniyada ilk Avropa Oyunlarının eksklüziv yayımçısı olacaq. Tamaşaçılar gələn il 17 gün davam edəcək yarışları bu telekanal vasitəsilə pulsuz izləyəcəklər.

SPORT1 kanalı Oyunları televiziya, internet, radio və mobil platformalar vasitəsilə əsasən canlı yayımla minimum 45 saat yayımlayacaq. Oyunların əsas məqamları ilə yanaşı, açılış və qapanma mərasimləri də efirə veriləcək.

Təşkilat komitəsindən AzərTac-a bildirilib ki, SPORT1 kanalının birinci Avropa Oyunlarını pulsuz şəkildə Avstriya və İsveçrədə, o cümlədən əlavə olaraq minimum 20 saat pullu televiziya kanallarında yayımlaması nəzərdə tutulur.

Müqaviləyə əsasən, Avropa Oyunları Türkiyə, Rumıniya, Macarıstan və Belçika ilə yanaşı, Almaniya, Avstriya və İsveçrədə də yayımlanacaq.

SPORT1 kanalı Almaniyada nüfuzlu idman yarışlarının pulsuz yayımı üzrə 20 ildən çox təcrübəyə malikdir. Təkcə 2014-cü il ərzində bu kanal "Soçi-2014" Qış Olimpiya Oyunlarında keçirilən sonuncu buzüstü hokkey turnamenti də daxil olmaqla 6000 saat mühüm idman yarışlarını yayımlayacaq.