ABŞ-ın Pensilvaniya Universitetinin hazırladığı dünyanın aparıcı beyin mərkəzlərinin reytinqi ilə bağlı beynəlxalq hesabat dünən BMT-nin Nyu Yorkdakı mənzil qərargahında təqdim edilib.

Axar.az xəbər verir ki, hesabatın təqdimatı dünyanın 100-dən artıq ölkəsində, eyni zamanda, beynəlxalq maliyyə qurumlarında, o cümlədən Dünya Bankında da təşkil edilib.

Qlobal reytinqlər müəyyənləşdirilən zaman dünyanın 182 ölkəsini təmsil edən 6545 beyin mərkəzi arasında sorğu keçirilib və sorğunun nəticələri 1500 ekspert tərəfindən qiymətləndirilib.

Beynəlxalq qiymətləndirmədə İqtisadi və Sosial İnkişaf Mərkəzi (CESD) Cənubi Qafqaz və Orta Asiyanın ən güclü beyin mərkəzi seçilib.

İqtisadi və Sosial İnkişaf Mərkəzinin rəhbəri Vüqar Bayramovun sözlərinə görə, CESD artıq 8 ildir ki, bu statusunu qoruyub saxlayır:

“Hələlik dünyada yeganə qlobal qiymətləndirmə olan və kifayət qədər nüfuzlu beynəlxalq hesabatda regionun aparıcı beyin mərkəzinin Azərbaycan təşkilatı olması sevindirici olmaqla yanaşı, eləcə də mərkəzimizin regional elmi və praktik tədqiqatlara töhfəsinin səviyyəsini göstərir. CESD regionun top beyin mərkəzi olmaq üçün Cənubi Qafqazın 3, Orta Asiyanın 5 ölkəsini və eləcə də Əfqanıstanı təmsil edən təşkilatlarla rəqabət aparıb”.

İqtisadçı vurğulayıb ki, CESD sözügeden hesabatda 23 kateqoriya üzrə dünyanın ən aparıcı beyin mərkəzləri siyahısına daxil edilib:

“Eyni zamanda, təşkilatımız illik büdcəsi 5 milyon dollardan az olan beyin mərkəzləri arasında dünyada 4-cü olmaqla yanaşı, dünyanın 10 ən yaxşı idarə olunan beyin mərkəzidir. CESD həmçinin dünyanın ən güclü 15 müstəqil beyin mərkəzindən biridir. Biz qlobal enerji və resurs siyasəti üzrə də ilk 15-likdə yer almışıq”.