Mərkəzi Bank ölkədə dolların məzənnəsinin artmasının qarşısını almağın yollarından biri kimi manatın dövriyyəsinin sərtləşdirilməsi siyasətinə müəyyən dərəcədə nail ola bilib.

Bu barədə iqtisadçı ekspert Natiq Cəfərli Axar.az-a açıqlamasında deyib. İqtisadçı son günlər bankların dollar hərraclarında zəif iştirak etməsinin səbəbini açıqlayıb:

"Ölkədə dolların məzənnəsinin artmasının qarşısını almağın yollarından biri kimi manatın dövriyyəsinin sərtləşdirilməsi siyasətinə MB müəyyən dərəcədə nail ola bilib. Ancaq başqa bir tərəfdən isə bankların əlində manat kütləsi qalmayıb. Bunun üçün də banklar valyuta hərracı əməliyyatlarında iştirak edə bilmir və auksionlarda daha az dollar almağa meyillənirlər. Ona görə MB bu məsələdə çox diqqətli olmalı, hər iki yöndə - həm iqtisadi aktivliyin artırılması, həm də məzənnənin tənzimlənməsi yönündə paralel addımlar atmalıdır. Yəni, dolların məzənnəsinin kəskin artmasının qarşısını almağa çalışarkən digər sahələrdə problemlərin yaranmaması üçün də çalışmalıdır. Çünki bu proses iqtisadi aktivliyə də təsir göstərir".

Qeyd edək ki, fevralın 10-da Mərkəzi Bank tərəfindən keçirilən növbəti valyuta hərracında 200 milyon ABŞ dolları məbləğində vəsait satışa çıxarılıb. Hərracda yalnız 1 bank 10 milyon dollar tələbi ilə iştirak edib.