Mərkəzi Bankın uçot dərəcəsi simvolik xarakter daşıyır və kredit bazarına təsir göstərmir.

Axar.az xəbər verir ki, bu barədə iqtisadçı alim Vüqar Bayramov açıqlama verib. Ekspert Mərkəzi Bankın uçot dərəcəsini 5 faizədək yüksəltməsini şərh edib:

"MB manatla yığımlara marağı artırmaq məqsədi daşıdığını bildirsə də, bu,elə də ciddi fərq yaratmayacaq.

İkincisi, bu rəqəm əvvəllər 3 faiz olduğu halda banklar istehlak kreditlərini 24-29 faizlə təklif edirdilər. Bu isə uçot dərəcəsi ilə kredit faizləri arasında 10 dəfəyə yaxın fərq demək idi. İndi isə bu fərq 6 dəfə olub. Belə kəskin fərqin olduğu kredit bazarına uçot dərəcəsinin təsirləri marjinaldır.

Üçüncüsü, baş bankın bu addımdan öncə də milli valyuta üzrə yığımlara daha çox faiz ödənilsə də, bu, manatla yığımlara marağın artmasına səbəb olmayıb. Əksinə, manatla depozitlərin ümumi depozit portfelində payı təxminən 50 faizdən 15 faizədək azalıb. Bu isə dollarlaşma səviyyəsinin necə yüksək olduğunu göstərir.

Dördüncüsü, kommersiya bankları əldə etdikləri vəsaitin təxminən 4/5-ni MB-dən kənar mənbələrdən cəlb etdiyindən bunun kredit bazarına və yığımlara elə də ciddi təsiri olmayacaq".