Dünən axşam saatlarında Hüriyyət Məmmədzadə tərəfindən bıçaqlanan şair Mübariz Məsimoğluna 3 saylı şəhər klinik xəstəxanasında baş çəkdik. Şairlə söhbətləşib həm vəziyyətini xəbər aldıq, həm də baş verən hadisənin təfərrüatını öyrəndik.

Axar.az Mübariz Məsimoğlu ilə söhbəti təqdim edir.

– Mübariz müəllim, indi necəsiniz?

– Altı yerdən yara almışam. Biri buddan, biri qarın boşluğundan, biri qoltuq altından, əlimdən və sinəmdən. Onların üçü əsaslı deyil, digər üçü ciddidir. Yəni bıçaq zərbəsi bir millimetr daha dərinə getsəydi, həyati təhlükə olardı. Xəstəxanaya dünən axşam gəlmişəm. Bu hadisəni törədən adamı da əvvəldən tanıyırdım. Hardasa 6 aydır ki, onunla danışmıram.

– Niyə danışdırmırdınız onu?

– Çünki o ziyalıya uyğun olmayan söhbətlər aparır. Ona görə demişdim ki, mən olan məclisdə sən oturma, sən olan yerlərə də mən gəlməyəcəm. Münasibətləri də bu şəkildə saxlamışdım. Dəfələrlə şair, yazıçı dostlarla barışıq üçün söz göndərmişdi. Amma mən də hər dəfəsində imtina etmişəm. Dünən axşam evə gəlirdim, təxminən saat 6-ya qalırdı. Yanımda tələbə yoldaşım, Vəli Xramçaylı, Arif və Cavanşir var idi. Hüriyyət də bu yoldaşlardan bəzilərini tanıyırdı. Ona görə bizimlə bir maşına oturdu. Başladı ki, gəlin, sizə qonaqlıq verim. Mən də etiraz etdim ki, səninlə oturmaq istəmirəm. O, yenidən təkid etdi. Mən maşından düşüb onun oturduğu tərəfin qapısını açdım. Düşən kimi sol böyrümdən bıçaq vurdu. İkinci, üçüncü zərbədə bıçağı əlindən aldım və onu vurdum. Bu məqamda cibindən ikinci bıçağı çıxartdı. Cavanşir onu qucaqlayıb, əlini saxlamaq istəyəndə ona da zərbə endirdi. Cavanşirin yarası daha dərindi, bağırsağı kəsilib. Ondan sonra Cavanşir özü yaralı-yaralı maşını tibb məntəqəsinə sürdü. Orada polisə məlumat verdilər, mən ifadə verdim və xəstəxanaya yerləşdirildik. Yəni bu, sırf yaramaz bir adamın hərəkəti nəticəsində baş vermiş bir hadisədir. Əslində, onu mən cəmiyyət içinə çıxardırdım. Ancaq özünü pis apardığına görə sonradan onunla görüşdən imtina etmişəm.

– Bəlkə, təhqir etmisiniz, bundan əsəbiləşib, sizə hücum edib.

– Yox, mən ona heç vaxt söyüş söyməmişəm. Sadəcə, altı ay əvvəl mən ona demişdim ki, dur, mənim masamdan get. O da məni söyüb çıxıb getmişdi. Ola bilər ki, kimlərsə məndən ona söz aparıblar.

– İçkili deyildiniz ki?

– Mən gündəlik olaraq məclislərdə içirəm. Özünüz bilirsiniz ki, şair məclisləri içkisiz olmur. Mən içəndə də özümü apara bilən adamam. İçki məclislərimiz ədəbi söhbətlərilə müşaiyət olunur. Amma iş ondadır ki, həmin gün içməmişdim.

– Aranızda hər hansı bir ədəbi polemika olubmu? Bəlkə, yaradıcılığınızı qısqanıb?

– Heç bir ədəbi polemikamız olmayıb. O, yaradıcılığımı qısqanmır. Amma cəmiyyətdəki nüfuzum onda qısqanclıq yarada bilər. Mənim ətrafımda olan adamlar artıq ondan uzaqlaşırlar. Bəlkə də, buna görə məndən qisas almaq istəyib. Çox cılız adamdır.

– Uzun müddətdir ki, mətbuatda görünmürsünüz. Bunun səbəbi nədir?

– Səbəb budur ki, "Yeni nəfəs" qəzeti maddi çatışmazlıqdan dayandı. Daha çox sosial şəbəkələrdə yazdıqlarımı paylaşıram. Son dövrlər isə ədəbi nəzəriyyə ilə məşğul oluram. Nizami Cəfərov, Vaqif Bayatlı Odər, Elçin İsgəndərzadə haqda kitablar yazmışam.

– Hər halda, ikiniz də yaradıcı insansınız. Hüriyyət Məmmədzadəni bağışlaya biləcəksinizmi?

– Azərbaycan balaca ölkədir. Mən onun özünə görə heç vaxt bağışlamaram. Ancaq onun ailəsi var, ortaq dostlarımız var. Bu barədə fikirləşərəm. Hələ ki, proses gedir, bu barədə sonra fikirləşmək olar. Mən heç kimə düşmən kimi yanaşmıram.

– Dostlarınız sizdən nigarandır. Onlara sözünüz varmı?

– Dostlarıma salamımı çatdır. Vəziyyətim çox yaxşıdır. Narahat olmasınlar. Həkimlərin səyi nəticəsində vəziyyətim yaxşıdır. Məndə heç bir fiziki travma qalmayacaq. Ancaq mənəvi travma var ki, gör məni kim vurub. Məni yaramaz bir adamın belə bir hərəkəti nəticəsində bu hala düşməyim incidir.