Almaniyada seçim turunun qalibi olan müğənni Andreas Kümmert Avstriyanın paytaxtı Vyanada təşkil ediləcək 60-cı "Avroviziya" musiqi yarışmasına getməyəcəyini açıqlayıb.

Axar.az xəbər verir ki, Hannoverdə təşkil edilən və Almaniya birinci televiziya kanalı ARD vasitəsi ilə yayımlanan seçim turunda "Ev mənim əllərimdədir" ("Home is in my hands") mahnısı ilə finala yüksələn və finalda tamaşaçıların dəstəyi sayəsində birinci olaraq Vyana biletini alan Kümmert yarışmada iştirak etmək istəməməsinin səbəbini açıqlamayıb.

Tamaşaçılara dəstəklərinə görə təşəkkür edən və seçim turunda ikinci yerə sahib olan Ann Sofinin bu yarışda iştirak etmək üçün daha münasib olduğunu söyləyən müğənninin qərarını nə aparıcı, nə də salonda olan tamaşaçılar dəyişə bilib: "Mən həqiqətən də bu seçimi qəbul edəcək halda deyiləm".

Müğənninin bu qərarı çoxları tərəfindən tənqid olunub. Beləliklə, may ayında Avstriyada təşkil olunacaq "Avroviziya" musiqi yarışmasında Almaniyanı 24 yaşlı Ann Sofi təmsil edəcək.

Xatırladaq ki, Almaniya 1982-ci və 2010-cu illərdə bu yarışın qalibi olub.