Bu günlərdə UniPrint mətbəəsində şair Musa Yaqub haqda "Qara daşın sədası" adlı kitab çap olunub.

Kitaba "Şeirin taleyi" adlı ön söz yazan şair Maarif Soltan kitabın tarixçəsi və çatışmazlıqlar haqda Axar.az-a danışıb:

"Kitaba ön söz yazmağım sırf təsadüfən oldu. Çap xərcləri sifarişçini razı salmadığı üçün mənə müraciət etdilər və mən şairə olan böyük hörmətimə görə nəşriyyat işlərini canla-başla boynuma götürdüm. Hazırlıq işləri getdiyi məqamda hiss etdim ki, kitabın məramı, məqsədi ilə bağlı nəsə yazıb açıqlama verməyə ehtiyac var. Ön söz yazmağım bu zərurətdən yarandı. Yazandan sonra Musa müəllimin özünə oxutmaq istədim, dedi, nə yazırsan yaz, çapdan sonra oxuyacağam. Sağ olsun, həmişəki kimi etibar elədi. Mən Musa Yaqubu kulta çevrilmiş şair saymıram. O, sevgisiylə, duyğularıyla, ağrılarıyla canlı bir insandır. Buna görə də onun yaradıcılığına da, şəxsiyyətinə də böyük bir el məhəbbəti var və ona yazılmış şeirlər, deyilmiş fikirlər də bu sevgidən qaynaqlanır. Süleyman Rüstəm, Məmməd Rahim, Bəxtiyar Vahabzadə, Məmməd Araz, Qabil, Mirzə İbrahimov, Nəbi Xəzri və onlarla başqa nəhəng söz adamları Musa Yaquba şeirlər həsr edəndə, haqqında fikir söyləyəndə o, hələ əyalətdə adi kənd müəllimiydi və ilk yazılarıyla yenicə diqqəti cəlb etməyə başlamışdı. Musa müəllimə olan bu sevgi təbiidir, bir növ, ağaca, çiçəyə, dağa, torpağa olan sevgidir və Musa Yaqubun özü də ədəbiyyatda bir təbiət hadisəsidir. Nə gizlədək, indi nələrinsə hesabına özləri haqqında qalın-qalın kitablar, xahiş-minnətlə özləri haqqında şeir yazdıranlar, fikir dedirdənlər var. Amma bu kitabda toplanmış 100-dən artıq qələm adamının yazdıqlarından Musa Yaqubun sonradan xəbəri olub və bunlar hələ tam siyahı deyil, kitabın çapından sonra məlum olub ki, kitabın tərtibçisi və redaktorunun böyük zəhmətiylə yanaşı, unutduqları da var. Məsələn, böyük yazıçılarımız Anarın, Elçinin, Fikrət Qocanın və başqa dəyərli qələm adamlarının fikirləri kitabda yer almayıb. Mən inanıram ki, Musa müəllim haqda hələ çox fikirlər deyiləcək, bundan sonra hələ çox şeirlər yazılacaq. Çünki ona olan bu el sevgisi tükənən deyil, bu sevgi davam etdikcə belə toplulara yenə ehtiyac olacaq və tərtibçilər də səhvlərini düzəltmək şansı qazanacaqlar".

Qeyd edək ki, kitabın redaktoru jurnalist-publisist Nəzirməmməd Zöhrablıdır.