Azərbaycanın bütün filmlərinin toplanacağı yeni sayt fəaliyyətə başlayıb.

Axar.az xəbər verir ki, yeni yaradılan saytda Azərbaycan filmləri ilə yanaşı dilimizə tərcümə olunmuş xarici filmlər də toplanacaq.

"azerikino.com" adlanan sayta hazırda 200-ə yaxın film yüklənib və bu proses davam etməkdədir. Saytda filmlər haqqında məlumatlar da yerləşdirilib.

Saytın yaradıcısı illərdir Azərbaycan kinosuna könüllü olaraq xidmət edən Vüsal Ağayevdir. Vüsal bəy Axar.az-a açıqlama verərək qısa müddətdə sayta 1000-ə yaxın film yerləşdirəcəklərini bildirib.

Xatırladaq ki, Vüsal Ağayev uzun illər Yutub video paylaşım saytında Azərbaycan kinosunun təbliğatı ilə məşğul olub. Bir müddət əvvəl onun yaratdığı "Azərbaycan kinosu" adlı kanal naməlum şəxslər tərəfindən şikayət edilərək bağladılıb.