Həftəsonu Kitabevim.az mağazalar şəbəkəsində Türkiyənin məşhur yazıçısı Qəhrəman Tazəoğlunun imza mərasimi və şeir gecəsi keçirilib.

Axar.az türkiyəli bestseller yazarla "ayaqüstü" aparılan müsahibəni təqdim edir:

- Klişe də olsa, bir sual vermək istəyirəm, Azərbaycan yazarlarından kimləri tanıyırsız?

- Azərbaycan yazarlarını tanımıram, amma biz Azərbaycana mahnıları ilə aşinayıq ("Ayrılıq" mahnısını zümzümə edir). Başda bu əsər olmaqla bir çox əsəri böyük zövqlə, ləzzətlə dinləyirik. Azərbaycanda olmaq çox gözəldir. Mən ilk dəfə gəlmişəm Bakıya, bu şəhəri çox sevdim. İnşallah yenidən dəvət edərlər.

- Bakını bəyəndiniz?

- Bakıya birinci dəfədir gəlirəm, yağışlı və küləkli hava olsa da, şəhəri gəzdik. Təkrar-təkrar gəlmək istəyərdim, inşallah dəvət edərsiz.

- Haraları gəzdiniz?

- Şəhidlər Xiyabanına getdik, Dağüstü parka çıxıb şəhərə baxdıq. Proqrama görə - bu gün də, dünən də proqramım var idi deyə, başqa yerlərə gedə bilmədik, inşallah sabah şəhəri bol-bol gəzəcəyəm.

- İki kitabınız Azərbaycan dilinə tərcümə olunub. Öz şeirlərinizi Azərbaycan dilində oxudunuzmu?

- Azərbaycan dilində oxudum, anlamağa, qavramağa çalışdım. Adamın öz yazdığı şeirlərini başqa dildə oxuması qəribə gəlir, Azərbaycan türkcəsində çətin anlaşılır, amma kitablarımın başqa dilə tərcümə olunması məni çox xoşbəxt elədi. Çünki ilk dəfədir ki, başqa bir dilə çevrilir. Bunlardan biri şeir, biri romandır.

- Bir az əvvəl dediniz ki (imza mərasimindəki çıxışında – red.), yazmaq üçün, öncə çoxlu oxumaq lazımdır. Dünya yazarlarından kimləri oxumusuz və hazırda kimləri oxuyursuz?

- Dünya klassiklərini demək olar ki, hamısını oxumuşam, çağdaş yazarlardan ad çəkməli olsam, Murathan Munqanı çox sevirəm, Təkin Yönəci, Aytən Mutlunu çox oxuyuram. Ayşə Kulin, Ahmet Ümit, Orxan Pamuku sevə-sevə oxuyuram, ən bəyəndiyim yazarlardılar. Və əlbəttə ki, Zülfü Livaneli.

- Oxuduğunuz yazarların hansından daha çox təsirlənmisiz?

- Daha çox Murathan Munqan.

- "Küsmək nədir, bilirmisin?" şeiri bəzi yerlərdə Nazim Hikmitin adına çıxarılır. Əsil müəllifi kimdir?

- Əslində, bu, anonim şeirdir. Anonim deyərkən Nazim Hikmətə aid olduğu deyilir, amma Nazim Hikməti çox oxumuşam, mənim bildiyim Nazim Hikmət elə şeir yazmaz, yaza bilməz. Eynən "Məni gözəl xatırla" şeirinin Orxan Vəlinin adına çıxarılması kimi... Bu şeir Okan Savcı adında 19 yaşlı istedadlı bir gənc dostumuzundur. Özü ilə şəxsən tanışlığım var. Həyatında ən az iki Orxan Vəli şeiri oxumuş adam, bu sözləri Orxan Vəlinin yazmayacağını bilir. Biz kitab oxumadığımız, bütün araşdırmalarımızı internet üzərindən apardığımız üçün, internetdəki bilgilərin doğru olduğunu zənn eləyirik. Bu da bir az yanlış bir şeydi.

Ezgin Kılıç adlı bir dostum var, "Ən son nə zaman bir qadını sevdin?" adlı şeiri var, mən də səsləndirmişəm, bu şeiri də Nejat İşlərin adına çıxırlar, müəllif əlində kitabı olduğu halda bu şeirin özünə aid olduğunu sübut eləyə bilmir.

- Şairlərin bir çoxunun şeirlərinə mahnılar bəstələnir, sizin də şeirlərinizə mahnılar bəstələnməsini istəyərdinizmi?

- Şeirlərimə mahnı bəstələnməsini əlbəttə istərdim, amma şeirlərin bəstələnməyə uyğun deyil. Mahnı sözü formatında yazılmayıb, mən heca ölçülü, qafiyəli yazmadığıma görə bir az çətindir bu, amma gənclər bir-ikisini bəstələyiblər.

- Köşə yazarlarından kimləri oxuyursuz? Siyasi yazarlardan?

- Siyasi yazarlardan (gülür), sözü hara gətirmək istədiyinizi anladım.

- Məsələn, Can Dündarı oxuyursuz?

- Yox, xeyir. Can Dündarı şəxsən tanıdığım üçün oxumuram, oxumaq da istəmirəm. Türk mətbuatında köşə yazarlarının çox müstəqil yaza bilmədiklərini, üzərlərində daima bir basqı olduğunu bilirəm, buna görə də çox oxuduğumu deyə bilmərəm. Çünki qələmin arxasındakı gözləntiləri bilirəm.

- Özünüz də siyasi hadisələrdən uzaq dayanırsız. Sizcə yazarın, şairin ictimai fikri olmalıdır, yoxsa yox?

- Olmalıdır, amma özünə saxlamalıdır, məncə. Mütləq ki, əsərlərində hər hansı bir şəkildə əks olunacaq. Mənim də əlbəttə ki, özümə görə siyasi fikirlərim var. Bunu bəyan eləməyi düz hesab eləmirəm, gördüyüm iş "Eşq yazarlığı". Mən eşqi yazıram. Eşqin də ideologiyası, sağı-solu yoxdur. Eşq hamı üçün var.

- Müasir türk rejissorlarından, aktyorlarından kimi bəyənirsiz? Məsələn, Nuri Bilgə Ceylanın Kann ödülü alması hadisəsinə türk mətbuatında geniş yer verilmədi. Sizin fikirləriniz?

- Hə, ayıb edildi. Nuri Bilgə Ceylan çox önəmli bir dəyərdir. O, yaxşı rejissor olmaqla yanaşı, həm də gözəl bir fotoqrafdır. Xüsusilə, Ceylanın qış fotoları çox bəyənilir, filmlərinə də deyiləcək söz yoxdur. Amma mənim üçün "Uzaq" filminin ayrı yeri var, NBC-ni çox sevirəm.

- Geyimləriniz çox sıradandı, marka geyinirsiz? Ayaqqabılarınızı xüsusi seçirsiz, yoxsa?

- Yox, marka geyinmirəm. Ayaqqabım, onurğamda yırtıq olduğuna və uzun müddət ayaq üstə qaldığıma görə xüsusi hazırlanır. Bircə ayaqqabılarım xüsusidir. Qalan hamısı adi geyimlərdir.

- Yazarlıqdan qazandığınız pul yaşamınızı təmin edirmi? Yoxsa başqa sahələrdən də gəliriniz var?

- Yox, başqa sahələrdən gəlirim yoxdur, yazarlıqdan qazandığım yaşayışımı təmin edir. Amma əgər kitablarımın 10 qat artığı pirat olunmasaydı, daha yaxşı şəraitdə yaşayardım.

- Türkiyə hökuməti yazarları dəstəkləyirmi? Xarici ölkələrdə tanınmalarında, əsərlərinin xarici dillərə tərcümə olunmasında maliyyə dəstəyi göstərirmi?

- Dövlətin bizim yazarlığımızla, kitablarımızın satışı ilə bağlı birbaşa qatqısı yoxdur. Tamamən özəl sektorda nəşriyyatlar çap eləyib satır, amma əlbəttə ki, dövlətə də çox yüksək miqdarda vergi ödəyirik.

- Azərbaycan oxucuları ilə görüşdünüz, bu sizdə necə təəssürat yaratdı?

- Birincisi, bunu deyim ki, Azərbaycanda bu qədər oxucum olduğunu bilmirdim. Feysbukda bura, "Bakıya gəlin" yazırdılar, amma bu qədər böyük kütlə olacağını düşünmürdüm. Dilin ağırlığına rəğmən bir çox kitabımı oxuyublar. Bu məni çox sevindirdi, təkrar-təkrar Bakıya gəlmək istərdim.

- Son olaraq oxucularınıza nə demək istərdiniz?

- Lütfən, oxumağa davam etsinlər, hətta aralarında yazanlar da var, onlar da yazmağa davam eləsinlər. Çünki bu ölkəyə oxuyan və yazan insan lazımdır. Hamısını çox sevirəm.

P.S. Tədbirdə iştirak edən gənc şair Zamir Erkin bir vaxtlar Türkiyə mətbuatına qədər gedib çıxan "Hər gün ağlımdan keçirsən, adam bir salam verər" (Her gün aklımdan geçiyorsun, insan bir selam verir) sözlərinin əslində Aşıq Veysələ yox, onun özünə aid olduğunu yazara xatırladıb, bundan sonra da belə bilinməsini xahiş etdi.