Dünya şöhrətli muğam ifaçısı Alim Qasımov 14 avqust 1957-ci ildə Qobustan rayonunun Nabur kəndində anadan olub. Bu gün böyük sənətkarın 58-ci doğum günüdür.

Alim Qasımovun musiqi duyumu, istedadı hələ uşaq vaxtından hamıya məlum olsa da, ailəsinin ona bu sahədə təhsil vermək imkanı yox idi. Atasının kəsdiyi keçinin dərisindən hazırlanan dəf gələcəyin böyük musiqiçisinin ilk aləti oldu.

Sonralar Bakıda tanınmış muğam ustalarından dərs alan Alim Qasımov özü də bu sahədə, xüsusilə, "tarab" janrı ilə bağlı araşdırmalar aparmağa başlayır.

İstedad heç vaxt itib batmır. Alim Qasımov da məhz istedadı sayəsində bir-birinin ardınca uğurlar qazanmağa başlayır. O, 1999-cu ildə Beynəlxalq IMC UNESCO Musiqi Mükafatını alıb. ABŞ-ın Corctaun Universiteti və mərkəzi İordaniyada yerləşən Strateji Araşdırmalar Mərkəzinin keçirdiyi müsabiqədə "Dünyanın ən nüfuzlu 500 müsəlmanı" arasında 4 azərbaycanlıdan biri olub.

Alim Qasımov İngiltərə, Fransa, Almaniya, İspaniya, Braziliya, Yaponiya və Amerika Birləşmiş Ştatları və s. ölkələrdə konsertlər verərək Azərbaycan muğamını dünyaya tanıdır.

Axar.az olaraq sənətkarın doğum gününü təbrik edir və onun ifasında "Şirvan şikəstəsi"ni təqdim edirik: