Ramiz Məlik və Ramiz Novruz arasında baş verən qalmaqal nazirliyin diqqətindədir.

Axar.az xəbər verir ki, bunu Mədəniyyət və Turizm Nazirliyinin İnformasiya və ictimaiyyətlə əlaqələr şöbəsinin müdiri Vüqar Şıxəmmədov deyib.

Nazirlik rəsmisi Report-a açıqlamasında Akademik Milli Dram Teatrının xalq artistləri arasında baş verən davaya münasibət bildirib.

"Sentyabrın əvvəlində teatr mövsümünün açılışı olacaq. Mövsümün açılışı ərəfəsində həm sonuncu, həm də bundan öncəki baş vermiş qalmaqala yenidən baxılacaq. Hadisələr araşdırılacaq, baş verənlər təhlil olunacaq".

Artıq aktyorlar barışıb. Ramiz Novruzun sözlərinə görə, barışıq Yasamal Rayon Polis İdarəsinin 2-ci Polis Bölməsində baş tutub: "Bu gün səhər Polis Bölməsində Ramiz Məlikdən üzr istədim. Barışdıq və Ramiz Məlik şikayət ərizəsini geri götürdü. Hazırda teatra gedirik.

Bir azdan teatrda kollektivin qarşısında yenidən Ramiz Məlikdən üzr istəyəcəm. O, məndən 12 yaş böyükdür. Ağsaqqaldır. Mən ona əl qaldırmışam. Əlim üzünə dəyib. Bilmədən olub. Əsəbi olmuşam".

R.Məlik də həmkarının dediklərini təsdiqləyib: "Mən böyüklük etdim. Onu bağışladım. Dəfələrlə üzr istədi. Polis bölməsində olduq və ərizəmi geri götürdüm. İndi teatra gedirəm. Saat 15:00-da kollektiv qarşısında məndən yenidən üzr istəyəcək. Barışdıq və söhbətin bitməsini istəyirəm".

Xatırladaq ki, avqustun 23-də aktyorlar arasında yumruqlaşma səviyyəsində dava olub. R.Məlik həmkarından polisə şikayət edib.